اللعبة الأمريكاني : “جيم أوفر” يا جماعه!

بعض الأفلام بتحاول تناقش كل القضايا وتقدم كل التيمات في خلال حوالي ساعتين هي عمر الفيلم. وفي الغالب الأفلام اللي بتحاول تركز على كل حاجه بتفشل في النهاية في تحقيق أي حاجه! وهو ده اللي حصل مع “اللعبة الأمريكاني”.

الفيلم بيحكي عن رجل وسيدة بيرتبطوا ببعض وبيحاولوا يحلوا المشاكل اللي بتواجههم، واللي هي معظم المشاكل اللي بتواجه الشباب في مصر. وفي طريقهم لحل مشاكلهم بتظهر مجموعة من المواقف المفترض أنها كوميدية بالإضافة لبعض مواقف الأكشن.

أحمد فهمي وناهد السباعي ممثلين أقوياء. لكن من الواضح أن أختيارهم لـ”اللعبة الأمريكاني” كان اختيار غير موفق. لأنهم في الأساس مش ممثلين كوميدين. بالتالي محاولات أدائهم الكوميدية كانت محتاجه توجيه أفضل من المخرج  مصطفى أبو سيف أو المؤلف  مدحت السباعي اللي كان الفيلم أخر أعماله قبل وفاته – رحمه الله-

وللأسف الشديد كان الاعتماد الأساسي في الكوميديا في الفيلم على الصراخ بصوت عالي والايحاءات الجنسية وكلها وسائل (راحت عليها) في محاولات عمل كوميديا قوية معتمدة بالأساس على المواقف.

اللعبة الأمريكاني كان محتاج تطويرات على صعيد الكتابة والإخراج والأداء التمثيلي علشان يكون الفيلم أقوى وأكثر تأثيرا أو إضحاكًا