المختارون.. سينما الخيال العلمي العربي!
يبدو أن فكرة إنتاج فيلم خيال علمي في المنطقة العربية كانت حلم بعيد المنال، يمكن بسبب خوف المنتجين من عدم تقبل المشاهدين بسهولة للنوعية دي من الأفلام، علشان كده كانت محاولات المنتجين والمخرجين الاقتراب من منطقة الخيال العلمي محدودة، ومختلطة الي حد بعيد بالفانتازيا على الرغم من الفرق الكبير بين فيلم الخيال العلمي اللي بياخد من العلم وسيلة للانطلاق بالقصة وتقديم خيال قائم عليه، وبين الفانتازيا القائمة علي فكرة كسر حدود العلم والواقع والتحليق في أبعاد من الخيال.
وفيلم المختارون أو the worthy اللي أنتجته الإمارات مؤخرا، بيلعب على الشعرة الفاصلة بين الخيال العلمي والرعب عن قصة بتدور في المستقبل، لما بيشهد العالم عدد من الصراعات الضخمة نتيجة تلوث مصادر المياه، وبيحاول بعض الناجين من الكوارث البحث عن مصدر مياه غير ملوثة
الفيلم بيحكي وقائع وفاة القائد شعيب (سامر المصري) عن طريق الغدر، وبيتولى القيادة بعده ابنه عيسى (محمود الأطرش)، لكن موسي (سامر اسماعيل) بيبدأ فى اشعال نار الفوضى فى المنطقة، الأمر اللي بيحمل اسقاطات سياسية ودينية كبيرة.
الفيلم من تأليف فيكرام ويت وإخراج علي مصطفي، واللي قدر يقدم لنا صورة مختلفة ومتطورة عن اللي اتعودنا عليه من الأفلام العربية بشكل عام، وقدم كادرات متميزة وحركات جديدة بالكاميرا، وبشكل عام نقدر نقول أن إخراجه للفيلم كان إضافة متميزة وعظيمة.
الموسيقي التصويرية لعبت دور مهم في الأحداث، كمان الديكورات كانت متميزة، لكن اختيار الملابس كان محتاج يكون أفضل شوية، وكتقييم عام نقدر نقول إن الفيلم يعتبر فيلم أجنبي تم تعريبه، وده على مستوي القصة والتصوير والإخراج وباقي العناصر.
لكن هل ده سيء؟ في رأينا انه من الازم الاستفادة بخبرات وأفكار الدول التانية علشان نقدر نقدم فيلم جيد، ولازم مايكونش التعريب والاقتباس سيف فوق رؤوسنا وتهمة جاهزة لأي محاولة لإنتاج أعمال مختلفة عن النهج السائد.
فيلم المختارون مش أفضل فيلم عربي شاهدناه، لكنه محاولة قوية وجيدة لإنتاج سينما مختلفة ومتميزة.
علشان تبقي عارف:
تم تصوير الفيلم في رومانيا.
