انت ايه: انتوا اللي ايه؟!
إحنا مش ضد الأفلام منخفضة الميزانية، أو اللي بيحاول الفنانين الشباب يقدموا فيها نفسهم للجمهور لأننا عارفين أن السينما بمعناها التجاري الاحترافي ممكن تبقى صعبة على الشباب في بداية مشوارهم الفني.
لكن اللي إحنا ضده فعلا هو حالة الاستهتار والاستسهال و الاسترخاص اللي بنشوفها في كل تفصيلة من تفاصيل الفيلم. ده لو صح أننا نسمي “انت ايه” فيلم أصلا!
“انت ايه” مقتبس عن الفيلم الهندي الشهير P.K بطولة عامر خان. واللي بيقدم قصة كائن فضائي بينزل الأرض ويبدأ في طرح أسئلة تبدو بسيطة لكنها في عمقها بتقدم أفكار فلسفية مهمة.
“أنت ايه” استوحي الاطار العام للقصة. لكنه لاقدم فلسفة ولا حتى قدم كوميديا! والحقيقة أن الفيلم قدم في النهاية خليط وحش جدا من محاولة تقديم أي خيط درامي أو كوميدي لكنه فشل في تقديم أي حاجة حتى مع كل محاولات بطل الفيلم ابرام سمير انه يكون كوميدي! وطبعا ده بيحصل في ظل شبه غياب تام للمخرج اللي واضح ان أسلوبه الاخراجي كان معتمد على انه يسيب كل ممثل يعمل اللي هو عاوزه بدون توجيه!
ولأن الفيلم منخفض أو ممكن نقول معدوم الميزانية فا تم الاستعانة ببعض الممثلين علشان يسندوا الأداء الضعيف من ابرام.. وياريتهم ماعملوا كده! علشان شوفنا طاهر أبو ليلة ونرمين ماهر وغيرهم في أسوأ حالاتهم السينمائية
واحنا بندور على تريلر الفيلم على يوتيوب.. لقينا أغنية “انت ايه” لنانسي عجرم.. لو صادفتكم ابقوا شوفوها.. احلى بكتير من الفيلم!
