انت حبيبي وبس : الخلطة السحرية مابقتش سحرية!
لو كنا من حوالي ٥ أو ٧ سنين فاتوا كان زمان فيلم انت حبيبي وبس محقق أعلى الإيرادات. وكان زماننا بنضرب كف بكف. لكن من الواضح أن الخلطة السرية اللي كانت بتكسر الدنيا في السينمات مابقتش سرية. والجمهور مابقاش يحبها.
فيلم انت حبيبي وبس بيقدم الخلطة السحرية اللي كانت بتجيب نتيجة مع الجمهور زمان. رقاصة مع مطرب أو مطربة وقصة خفيفة وكوميديا معتمدة على الإيفيهات مش المواقف. وكام أغنية على مطارده. ونبقى عملنا أعلى إيرادات في العيد.
لكن لما تبقى الأفلام المعروضة بقوة الفيل الأزرق والكنز في اجزائهم الثانية، يعني أفلام أثبتت نفسها وكونت جماهيرية قوية. فيلم زي انت حبيبي وبس مش بيلاقي نفس الإقبال اللي كان ممكن يلاقيه في السنين اللي فاتت.
لما بنتكلم عن فيلم بيقوم ببطولته اتنين مطربين (محمود الليثي وبوسي) لازم نقلل توقعاتنا بخصوص التمثيل وقوته شويه. لكن حتى مع درجات الرأفة كان الأداء التمثيلي للثنائي الشهير أقل من أي توقعات. ومش بنشوف الليثي غير علشان ينضرب بالقلم وهي عاده (سبكية) مشهورة مش عارفين ايه الكوميدي فيها بالظبط!
بالنسبة للقصة بقى. القصة بتدور عن وصية بمبلغ كبير لكن صرفها للورثة واقف على بند واحد فقط هو زواج الأبطال. القصة اللي أتهرست في ألف فيلم قبل كده. لكن حتى مع التكرار ده فشل الفيلم في أنه يقدم لنا أي خيط كوميدي حقيقي يخلينا نبتسم ولو ابتسامة واحده!
انت حبيبي وبس فيلم ما تدخلوش غير لو عاوز تسمع أغاني جديدة لبوسي ومحمود الليثي!