انت مين من شخصيات افلام عيد الفطر 2018
ايه اكتر حاجه بنحبها في الأفلام؟ الشخصيات اللي بنشوفها على الشاشة، والأنماط المختلفة اللي بنحس طوال الوقت أن جزء كبير من تركيبتها متاخده من شخصياتنا احنا بالذات. وبما ان عيد الفطر من الأعياد المشهورة بالأفلام. لازم كل واحد فينا هايحس أن واحد من أبطال الأفلام اللي شافها في العيد بيمثل شخصيته هو. والاختبار ده هايساعد كل واحد فينا يعرف هو مين.
- بتحب المخاطرة ومش بتحسب النتائج المترتبة على المخاطرات بتاعتك طالما بتشعر في النهاية أنك على حق؟
- بتنتصر للحق وتحب تجيب حق المظلوم مهما بانت لك صعوبة الانتصار للحق ومهما كان الظالم قوي ومسيطر؟
- قلبك ميت وممكن تعمل أي حاجه طالما مقتنع بيها مهما كانت النتيجة؟
- بتحب المواجهة ومش بتخاف تقول للظالم انت ظالم في عينه مهما حصل لك من متاعب نتيجة ده؟
لو فيك الصفات دي يبقى انت اكيد (يوسف المصري) أو امير كرارة اللي قام بدور مأمور القسم في فيلم حرب كرموز، واللي بيرفض تسليم شباب مصريين وطنيين انقذوا بنت مصرية من الاغتصاب على أيد ضابط انجليزي من ضمن القوات الإنجليزية اللي احتلت مصر في فترة اربعينيات القرن العشرين.
- لما بتقع في أي موقف صعب بتعرف تخرج منه بالحيلة واختلاق الأكاذيب؟
- بتكدب اكتر ما بتتنفس؟
- من محبي نظرية المؤامرة وأن أجهزة المخابرات واقفة وراء كل حاجة بتحصل حوالينا في المجتمع
- بتعرف تعمل حوارات من مافيش؟ لو روحت الشغل متأخر تقول للمدير بتاعك انك اتأخرت علشان كنت بتنقذ أسرة بريئة من غزو فضائي؟
لو فيك الصفات دي تبقى سرور أبو الدهب النصاب المحترف من فيلم ليلة هنا وسرور، واللي اقنع زوجته انه ضابط مخابرات مصري بيهرب من الموساد والمخابرات الروسية علشان يسرق قطعة اثرية مهمة ويقدر يبيعها! شخصية بتكدب زي ما بتتنفس!
- شايفة نفسك جريئة ومش فارق معاكي حد وممكن تعملي أي حاجه في أي وقت؟
- لما بتخرجي مع صاحباتك بتكوني انتي اللي بتواجهي أي مشكلة او خطر يقابل الشلة زي مثلا العامل مع السايس المختل عقليا؟
- متناقضة وبتحبي الأطفال لكن في نفس الوقت بتكرهي المشاكل اللي ممكن يوقعوكي فيها او المصايب اللي بيعملوها في البيت؟
- أيام المدرسة كنتي شقية وبتعملي مشاكل مع الكل وطول الوقت بيجيبلك استدعاء ولي امر؟
انتي اكيد لو فيكي الصفات دي تبقي الابلة طمطم من الفيلم اللي بيحمل اسمها.. مدرسة بتواجه مجموعة من المجرمين اللي بياخدوا الطلاب اللي فيها رهائن
- بتحاول تعيش دور البلطجي الجامد اللي مافيش حاجه ينفع تقف قدامه؟
- على الرغم من ان ملامحك وجسمك بيقولو ان مالكش قلب لكن قلبك كبير ودمعتك قريبة؟
- وقت المشاكل صحابك بيخلوك تتكلم علشان شكلك بيخوف الناس؟
- بتحب القلش والهزار وتحب تعمل مقالب في الناس طول الوقت؟
لو الصفات دي تنطبق عليك تبقى اكيد مجدي تختوخ او شيكو.. بطل فيلم قلب امه اللي بيتناول فنتازيا عملية نقل قلب من ام حنونه لمجرم محترف.. الامر اللي بيترتب عليه سلسلة لا تتوقف من المواقف الكوميدية والمشاكل المضحكة.
