بابا: فيلم يستحق التحية
بصراحة، ما كانش عندنا توقعات كبيرة عن فيلم “بابا” قبل ما نشوفه، يمكن بسبب توقيت نزوله فى العيد الصغير، والفكرة الثابتة عندنا أن ده موسم أفلام المقاولات عديمة المعنى منخفضة الإنتاج، لكن بعد ما شوفنا الفيلم عرفنا أن موسم العيد ممكن يكون له بعض الحالات الشاذة لأفلام حقيقية بـ تحترم مشاهديها.
الفيلم بـ يحكى عن دكتور أمراض نساء وتوليد (السقا) بـ يرتبط بمهندسة ديكور (درة التونسية) وبـ يتزوجوا بعد قصة حب جميلة ورومانسية، وبعد فترة من زواجهم بـ تطلب درة من زوجها أنها تعمل عملية تلقيح صناعى لأنها مستعجلة على الإنجاب، علشان تتوالى الأحداث اللى مش عاوزين نحرقها لكم.
أحمد السقا بعد سلسلة من أدوار الأكشن سينمائيًا ودراميًا فى فيلم “المصلحة” ومسلسل “خطوط حمراء” اللى عُرض فى رمضان بـ يجرب نفسه فى نوعية جديدة من الأدوار هى الإنسانية الاجتماعية الرومانسية اللى يمكن كنا بـ نشوفه فيها لكن على هامش دور الأكشن اللى بـ يقدمه، زى أدواره فى أفلام “أفريكانو” و”مافيا” وغيرها، السقا أثبت أنه فنان محترم وشامل ويقدر يقدم أى دور يُطلب منه بنفس كفائته فى أدوار الأكشن.
درة التونسية.. بعد سلسلة نجاحها فى كثير من الأعمال السينمائية والدرامية، دورها فى فيلم “بابا” يعتبر محطة جديدة ناجحة لها، فى بعض المشاهد كانت Over إلى حد ما لكن مع شوية تركيز ممكن تكون أحسن.
إدوارد.. قدم واحد من الأدوار اللى دائمًا بـ نتوقعه فيها، رغم نجاحه أنه يخرج من جلده فى بعض الأحيان زى دوره فى مسلسل “رقم مجهول” فى رمضان، إلا أنه رجع ثانى لنوعية أدوار البطولة الثانية للظهور كمجرد صديق البطل اللى بـ يتسبب فى كثير من المواقف الكوميدية.
صلاح عبد الله.. قدم دور معتاد على تقديمه كعنصر مساند للبطل وبـ يرسم الضحك على وجه المشاهد مش أكثر.. صلاح عبد الله غول تمثيلى لازم يتم توظيفه فى أعمال أقوى من نوعية أدوار حسن حسنى المعهودة.
إيمان السيد قدمت واحد من أسوأ أدوارها اللى هى أصلاً ضعيفة.. المرة دى فشلت أنها ترسم البهجة على وجوه المشاهدين، إيمان ممكن تقدم أحسن من كده لو ركزت على نفسها.
الإخراج المتميز لعلى إدريس بـ يحطه على أول الطريق لتقديم أفلام حقيقية، بعد سلسلة من الأعمال اللى ما ترتقيش لنوعية أفلام زى “بابا”.. ممكن نعيب عليه بعض الـ Over الإخراجى فى بعض المشاهد زى مشهد عيد ميلاد السقا فى الدولة العربية، لكن مشاهد ثانية زى مشهد الولادة فى الفرح كان فيها خفة روح إخراجية رائعة.
الديكور والموسيقى التصويرية كان لهم تأثير جميل على المشاهدين وعلى الفيلم بالكامل وتضافروا مع باقى العناصر فى تقديم فيلم هادف بروح فكاهية جميلة نتمنى نشوفها باستمرار فى أعمالنا.
