برا المنهج : فتح عينك على قصة حياتك الحقيقية!

تخيل لو قررت في يوم تكتب قصة حياتك. هل هاتكتبها بالرواية (الرسمية) اللي تطلعك ملاك، وأن شخصيتك هي شخصية انسان رائع وعظيم، وأن أخطائك مصدرها طيبة قلبك وثقتك الزايده في الناس، ولا هاتكتب الرواية اللي (بره المنهج) واللي هاتقول فيها الحقيقة بدون اعتبار لأي حاجه؟

فيلم (برا المنهج) اللي شوفناه على منصة شاهد، بعد نهاية عرضه في السينمات، بيحكي عن (نور) -قام بالدور الطفل عمر شريف- اللي قصة حياته لها روايتين.. رواية (جوه المنهج) اللي بنشوفه فيها طفل مجتهد شاطر في دروسه عايش حياه مثالية، والقصة الحقيقية (برا المنهج) اللي بنشوفه فيها طفل بيعاني من التنمر في المدرسة، والجهل والعنف بره المدرسة، لحد ما بيحصل له حدث مش عاوزين نحرقه عليكم، بيغير حياته تماما.

الفكرة من (برا المنهج) اللي ألفه عمرو سلامة وخالد دياب، انهم يقولولنا بلاش نستسلم لفكرة الرواية الواحدة لأي قصة بنشوفها، وأننا لازم نشغل دماغنا علشان نعرف القصة اللي (برا المنهج). وشوفنا أمثله على ده خلال أحداث الفيلم، بطريقة اخراجية جميلة قوي استخدمت الخدع السينمائية البسيطة والجميلة في نفس الوقت علشان توصل المعنى والهدف.

ماجد الكدواني قدم دور رائع.. والصراحة احنا تعبنا من تكرار الجملة دي. لدرجة أننا ممكن ناخدها Copy و Paste من أي دور تاني للكدواني! لكن ببساطه. ماجد عارف كويس قوي هو بيعمل ايه، وبيضيف أبعاد مختلفة وجديدة لأي شخصية بيلعبها. نفس الفكرة تنطبق على روبي في شخصية جيهان، مُدرسة الموسيقى في المدرسة. لكن أحلى أداء في الفيلم أكيد من نصيب عمر شريف، في دور (نور). واللي خلانا نتوقع له يكون له مستقبل أكتر من مبهر في السينما.

من أحلى الحاجات اللي عجبتنا في (برا المنهج) كمان، موسيقى راجح داوود. وتوظيفها في المشاهد بشكل رهيب، موسيقى مُحترفة بتوظيف فنان، خلاها لاعب أساسي في الأحداث، وتعرف تخلينا نعلى بمودنا مع كل مشهد بنشوفه.

صعب نحصر رسالة (برا المنهج) في الكلام اللي قولناه بس. الفيلم بيلعب على نفس الوتر اللي لعب عليه فيلم (لامؤاخذة) للمخرج عمرو سلامه برضو. ونقدر نقول أن سلامة هو الوحيد تقريبا اللي اقترب من قصص الشباب في سن بداية المراهقة وبداية الانفتاح على الحياة، وتناولهم في أعماله بصدق بدون ما يطلعهم شياطين، أو ملايكه بأجنحة.

برا المنهج فيلم عربي جميل، صالح للمشاهدة الاسرية، فيه كوميديا وفيه تراجيديا، كل ده مع موسيقى وديكورات يخطفوا العين والأذن.. وبننصح بيه جدا.