بيكيا: هل القصة لوحدها تخلي الفيلم ينجح؟
عامل القوة الوحيد في فيلم محمد رجب الاخير كان قصته الشيقة.. القصة اللي بتمزج بين الغموض والاكشن والكوميديا في نفس الوقت. لكن هل تكفي القصة الجيدة فقط علشان تقدم فيلم ناجح؟
(بيكيا) بيحكي عن مصطفى (محمد رجب) اللي بيكتشف علاج لمرض خطير، الامر اللي بيضعه هدف لمنظمة دولية خطيرة، بتحاول تقتله، الأمر اللي بيدخله في مجموعة من التعقيدات اللي مش عاوزين نحرقها عليكم علشان الأحداث.
الأداء التمثيلي لمعظم ابطال الفيلم كان محتاج يكون أفضل. حسينا طوال الوقت أن كل واحد من أبطال الفيلم كان بيأدي دورة من منطقة الراحة والأمان بالنسبة له. بدون اي محاولة من اي واحد من ابطال الفيلم انه يقدم اداء جديد او تجربة مختلفة في الشخصية المطلوبة منه.
ايتن عامر قدمت اداء جيد، واجتهاد محمد رجب كان واضح من البداية للنهاية، لكن حسينا أن الظروف الأنتاجية الخاصة بالفيلم ظلمته، خاصة مع طرح افلام قوية في المنافسة امامه زي البدلة والكويسين.
المخرج محمد حمدي في رأينا محتاج يكون له بصمته الاخراجية الخاصة علشان يقدر يقدم افلام مش بس بتحمل اسمه لكن كمان بتحمل بصمة اسلوبة الاخراجي. حمدي هو المخرج المفضل لمحمد رجب والاتنين قدموا مع بعض ثنائي تعاوني اشتركوا في عدة اعمال زي صابر جوجل و سالم ابو اخته ومحترم الا ربع وغيرها.
الموسيقى التصويرية وديكورات الفيلم كان ممكن تكون افضل لو تم الاهتمام بها انتاجيا زي ما قولنا، وبشكل عام الجمهور اللي بيدخل النوع ده من الافلام مش بيهتم كتير بالموسيقى والديكورات بقدر الاهتمام بالقصة والسيناريو.
بيكيا كان ممكن يكون فيلم افضل لو تم الاهتمام به انتاجيا اكتر. ولو تم طرحه في غير مواسم (الطحن) السينمائية اللي بتنزل فيها افلام كتير وتتنافس بقوة.
نصيحة كايرو360: الفنانة أيتن عامر هي شقيقة الفنانة وفاء عامر. من مواليد الاسكندرية وانتقلت للقاهرة للدراسة في معهد الفنون المسرحية.
