بيومي فؤاد.. جوكر دراما رمضان وأفلام العيد
“حالة من السخرية والجدل” يمكن يكون ده الوصف الوحيد المناسب للحالة اللي أثارها الظهور المتعدد للفنان بيومي فؤاد فى عدد كبير من المسلسلات فى سباق رمضان2016، ويمكن اللى زاد وغطي إن بيومي ماظهرش بس فى المسلسلات، أيضاً ظهر فى برامج المقالب والإعلانات، وده جعل بعض المشاهدين يشعر أنه محاصر بظهورات بيومي فؤاد المتعدده، وده اللى بنحاول نشرحه فى موضوعنا.
بيومي مين؟!
بيومي فؤاد هو ممثل مصري، من مواليد القاهرة سنة 1965. تخرج ضمن الدفعة الأولى لمركز الإبداع الفني، قسم إخراج، بدأ العمل سينمائيًا بأدوار صغيرة في أفلام منها: إحكي يا شهر زاد، 678، و(أسماء). بالإضافة إلى أعمال تليفزيونية، زي: (أبواب الخوف) 2011، (رقم مجهول) 2012، و(اسم مؤقت) 2013. زادت شهرته مع مشاركته في مسلسل (الكبير قوي) بأجزائه الأربعة 2010: 2014. كما حقق نجاحًا كبيرا عام 2013 بمشاركته في مسلسل (موجة حارة).
قد يكون ده الكلام (الرسمي) عن بيومي فؤاد، لكن الكلام اللى بيقوله زملاؤه فى الوسط الفني، هو إنه فنان مجتهد إلي أقصي درجة، ومن خلفية مسرحية –يعني بدأ حياته الفنية فى المسرح وده يعتبر ميزة كبيرة- وإنه كان فى البداية فنان تشكيلي، ولسه محافظ على حبه للفن التشكيلي.
بيومي فين؟!
لو حاولنا نحصر الأعمال الفنية اللى بيظهر فيها فؤاد فى رمضان الحالي، يكفي إننا نقول إنه ظهر فى أعمال “رأس الغول”، “الميزان”، “نيللي وشريهان”، “هي ودافنشي”، “شهادة ميلاد”، “بنات سوبر مان”، “الكيف”،”أنا وبابا وماما”، و”صد رد”. بالإضافة لبرامج المقالب زي رامز بيلعب بالنار ومجموعة من الإعلانات كان أبرزها إعلان شيكولاته ماندولين والمبادرة المصرية لترشيد استهلاك الوقود والمبادرة المصرية ضد الفساد.
بيومي نفسه بيقول إن مكانش عنده الوقت الكافي لمشاهدة أسرته، إبنه كتب على الفيس بوك إنه شاف بيومي فؤاد فى التليفزيون أكتر ما شافه فى البيت! أما حفلات السخرية والمرح اللى قامت على مواقع التواصل الإجتماعي فكانت حالة من الهرج والمرج، منها بعض التعليقات المرحة زي تعليق “الشىء الزيادة اللى كان المفروض يقدمه بيومي فؤاد هو أذان المغرب”
التعليق الوحيد اللى ضايق بيومي فؤاد وخلاه يزعل من صاحبه هو مجموعة التعليقات السخيفة اللى قالها رامز جلال فى مقدمة برنامجه (رامز بيلعب بالنار) عن بيومي فؤاد، وسخريته من وزنه الزائد وملابسه الداخلية وحاجات كتير وصفها بيومي فؤاد إنها (خيانة) لإن الجزء ده من البرنامج بيتصور بعد المقلب، والضيف مش بيعرف عنه حاجه.
بيومي ليه؟!
البعض بيقول إن السبب فى ظهور بيومي فؤاد فى معظم أعمال دراما رمضان هو لجوئه لتخفيض أجره علشان يظهر فى أعمال كتير، لكن فى رأينا إن ده مش صحيح، لإن بيومي حقق نجاح كبير فى رمضان الماضي، ويبدو إنه عمل حساباته بشكل صحيح وفكر إنه حالياً فى مرحلة إنتشار وتحقيق قاعدة جماهيرية كبيرة يقدر يستند عليها فى المستقبل.
كمان لازم نقول إن بيومي قدر يقدم كل دور من أدواره بشكل مختلف عن الدور الأخر، والحقيقة إننا بنشوف فنانين كبار بيحصروا نفسهم فى نوعية أدوار واحده مهما قلت مشاركاتهم أو زادت، لكن بيومي قدر يثبت إنه قدر ينتقل من التراجيديا للكوميديا وكل الألوان النفسية بينهما بمجرد قرار صغير منه، وقدر يقدم ألف وجه ووجه فى رمضان 2016 بشكل يحسب له، ويكفى ان المشاهدين بيشوفوا بيومي فى معظم أعمال السنة، بدون شعور منهم ناحيته بالملل أو الغضب من ظهوره المتكرر.
بيومي إلي أين؟!
وعلشان ماحدش يستغرب، لازم ننوه من دلوقتي ونقول إن بيومي فؤاد هايشارك السنة دي فى معظم أفلام موسم عيد الفطر، علشان الناس ما تستغربش من ظهوره فى رمضان والعيد على التوالي، وقدرنا نرصد ظهور بيومي فؤاد فى أفلام (سطو مثلث) و (جحيم فى الهند) و (أبو شنب) و (عسل أبيض)، وده بيفتح أمامنا سؤال أخير فضلنا نختتم بيه كلامنا عن بيومي فؤاد : هل احنا بنشهد مرحلة انتشار فني لنجم واعد، أم إن الموضوع تحول لخلق ظاهرة سينمائية جديدة مشابهة لظاهرة (حسن حسني) اللى كان ظهوره فى أي عمل فني زي ورقة البوسته؟!
الإجابة دي هانعرفها بعد نهاية موسم عيد الفطر المبارك… علشان نقدر نحكم على أداء بيومي فؤاد وظهوراته المتعدده.
