تصبح على خير: وانت من أهله يا تامر!

تامر حسني قدر في الفترة الأخيرة يقدم بعض الأفلام اللي ممكن نقول أنها كوميدية، لكن للأسف في فيلمه الأخير تصبح على خير وصل لمرحلة صعبة جدا من الاستسهال والاستسراع في الدفع بأفلامه علشان تلحق سباق الأعياد.

القصة

الفيلم بيحكي عن المهندس الغني حسام الخديوي، واللي بيعيش في مستوى مادي واجتماعي عالي جدا، لكنه بيعاني من مشكلة نفسية بيخليه يجرب تجربة فانتازية جديدة من خلال دخوله في مجموعة من الأحلام اللي بتغير حياته وتخليه يعيد التفكير في كل تفاصيل حياته من أول وجديد.

فريق العمل

الفيلم من بطولة تامر حسني ومي عمر ونور ودره. بالإضافة لمشاركة بدرية طلبه ومحمود البزاوي. تأليف وإخراج الفيلم لمحمد سامي (زوج مي عمر بالمناسبة) أما محمد عبد السلام فكان مخرج منفذ للفيلم.

الأداء التمثيلي

أداء تامر حسني كان هو نفس أداؤه في معظم أعماله التانيه بدون اختلاف كبير. كذلك مي عمر حسينا أن وجودها في الفيلم كان مجرد تحصيل حاصل بدون أي إضافة جديدة، أما درة ونور فوقع عليهم عبء الإدارة الدرامية للأحداث وقيادة السيناريو للمنطقة المطلوبة منه بالظبط، بينما كان عبء الكوميديا موزع على جميع المشاركين في الفيلم. وللأسف مكانش فيه هناك كوميديا تذكر!

السيناريو والحوار والأخراج

سيناريو الفيلم كان بيعاني من بعض المشكلات، وزودها أكتر مونتاج الفيلم اللي كان فيه كتير من الأخطاء، أما الحوار فكان المفروض يكون كوميدي من خلال جرعة الايفيهات الكبيرة اللي كانت فيه لكن في النهاية الايفيهات كانت قديمة ومستهلكة ومكانش فيها كوميديا تذكر.

الديكور والموسيقى والصورة

ديكورات الفيلم كانت جيده جدا، والصورة كانت دايما مشرقة ومفعمة بالألوان ودي نقطة تحسب للفيلم. كمان الموسيقى التصويرية والأغاني كانت مميزة، وبشكل عام العوامل دي تعتبر – للأسف – نقطة القوة الوحيدة في تصبح على خير.

الخلاصة

تصبح على خير مش أفضل أفلام العيد ومش أفضل أفلام تامر حسني. لكن محبي المطرب المشهور هايدخلوا الفيلم وهايعجبهم بسبب اعجابهم بتامر.

علشان تبقى عارف: الفيلم يعتبر ثاني فيلم لمحمد سامي في موسم عيد الفطر 2017 بعد فيلم جواب اعتقال