توقعات كايرو 360 للفائزين بأوسكار 2016

يوم الإمتحان يُكرم المرء أو يهان.. هى دي الحكمة اللى كلنا عارفينها… نقدر نقول إن يوم حفل توزيع جوائز الأوسكار هو يوم إعلان نتيجة إمتحان سينمائى طويل إستمر على مدار سنة كاملة، شوفنا فيها صراع شبه دموي على واحدة من أهم الجوائز الفنية السينمائية فى العالم إن لم تكن أهم جائزة على الإطلاق.. الجائزة اللى يمكن وصفها بـ(جائزة نوبل فى السينما) واللى بينتظر ملايين من المشاهدين حفل توزيع جوائزها اللى هايكون خلال ساعات.. هانعرف بعدها مين نجح فى الإمتحان.. ومين فشل.

بنقدم لكم فى كايرو360 رصد لأهم الفئاات اللى بتتصارع عليها الأفلام السنة دي، وتوقعاتنا الشخصية فى الفوز أو الخسارة، وطبعا بننتظر منكم توقعاتكم الشخصية فى التعليقات.

الحفل هايكون من تقديم النجم الأسمر كريس روك، والحقيقة دي بتكون المرة التانية لـ(كريس) انه يقدم الأوسكار، وبنعتقد إن إختيار ممثل أسمر لتقديم الحفل كان للرد على الإدعاءات اللى بتقول إن جائزة الأوسكار جائزة موجهة وإنها مش بتعترف فى إختياراتها بالفنانين من أصول أفريقية.

فى قائمة أفضل دمج أصوات بيتنافس:

Sicario
Mad Max: Fury Road
The Martian
The Revenant
Star Wars: The Force Awakens

وبنعتقد إن الجزء الأحدث من Star Wars هايكون قادر على حصد الجائزة، لإن الإنفاق التقني على الفيلم كان منقطع النظير، وبشكل عام الفيلم كان واحد من أكثر أفلام السنة إثارة وتم تخصيص ميزانية ضخمة لإنتاجة، ونعتقد إن العمليات التقنية اللى صاحبت الفيلم هى كمان كانت قوية ومؤثرة، الأمر اللى بيخلى الفيلم من وجهه نظرنا قادر على حصد الجايزه.

أفضل تحرير للأصوات

The Revenant
Ex Machina
Mad Max: Fury Road
The Martian
Star Wars: The Force Awakens

ومن جديد بنعتقد هنا إن star wars هو كمان قادر على حصد  الجايزة زي ما قولنا علشان الميزانية الضخمة اللى تم انتاج الفيلم بيها، واللى وفرت له دعم تقني عالى المستوي بيخليه قادر على المنافسة بشكل كبير على الجايزة فى القطاعات التقنية أو بمعني أخر الشغل اللى بيحصل وراء الكاميرا.

أفضل مؤثرات بصريّة

Ex Machina
Mad Max: Fury Road
The Martian
The Revenant
Star Wars: The Force Awakens

وهنا عندنا رجاء شخصى أو أمنية شخصية، وهى إن فيلم Mad Max  يحصد الجائزة، لإن الفيلم كان متعوب عليه جدا فيما يتعلق بالمؤثرات البصرية، لكن لو هانتكلم على التوقع الفني البحث بدون أي نوع من التمني، نعتقد إن الجزء الجديد من star wars هو كمان هايحصد الجائزة، وده برضو بسبب تفوق الفيلم من الناحية المادية عن معظم الأفلام اللى صدرت خلال العام.

أفضل موسيقى تصويرية

Bridge of Spies
The Hateful Eight
Carol
Sicario
Star Wars: The Force Awakens

بنعتقد هنا إن فيلم Bridge of Spies هايقدر يحصد الجايزة بدون أدني مشاكل فى المنافسة مع باقى الأفلام، لإن فعلا مستوي الموسيقي التصويرية الهادية والمتميزة للفيلم، واللى تناغمت مع الأحداث بشكل رائع هاتكون قادرة على مداعبة أذان لجنة التحكيم والفوز بالجائزة كأفضل موسيقي تصويرية خلال السنة.

أفضل أغنية

Fifty Shades of Grey – Earned It
Racing Extinction – Manta Ray
Youth – Simple Song #3
The Hunting Ground – Til It Happens To You
Spectre – Writing’s On The Wall

وبنتوقع هنا فوز The Hunting Ground – Til It Happens To You بالجائزة، نظراً لحالة الجدل اللى أثارها تصوير الأغنية، بالإضافة للمستوي المتميز للأغنية على الصعيد الفني عن باقى الأغاني اللى بتتنافس على الأوسكار السنة دي.. لاحظنا إن إحساس الأغنية كان أفضل وأقوي من باقى الأغاني، كمان الإسلوب الغنائى والموسيقي الخاصين بالأغنية كانوا أفضل ما يمكن.

أفضل مكياج

The 100-Year-Old Man Who Climbed out the Window and Disappeared – Love Larson and Eva von Bahr
Mad Max: Fury Road – Lesley Vanderwalt, Damian Martin
The Revenant – Sian Grigg, Duncan Jarman, Robert Pandini

وبنعتقد إن Mad Max هايكون قادر على حصد الجائزة، لتميز الماكياج الخاص بالفيلم، واللى أدي لتغيير شكل أبطال الفيلم كلهم تقريباً بدون تمييز بين ممثل والتاني، بالإضافة لقدرة  الماكياج على لعب دور حقيقي فى أحداث الفيلم لما قدر يعكس لنا نفسية أبطال الفيلم على وجوههم، وتحسين ردود أفعالهم فى المشاهد المختلفة.

أفضل تحرير

The Big Short – Hank Corwin
Spotlight – Tom McArdle
Mad Max: Fury Road – Margaret Sixel
Star Wars: The Force Awakens – Maryann Brandon and Mary Jo Markey
The Revenant – Stephen Mirrione

وبنعتقد هنا إن فيلم Mad Max هايكون حاضر بقوة وهايقدر يحصد جائزة أفضل تحرير أو Editing  لإن الفيلم كان معتمد على عملية معقدة من التحرير أو المونتاج واللى أدت فى النهاية لظهور مشاهد عبقرية عكست –مع باقى عناصر الفيلم- حالة من التميز، جعلتنا إحنا نفسنا متحيزين للفيلم وبنتمني إنه يحصد الجائزة.

أفضل تصميم أزياء

The Revenant – Jacqueline West
Carol – Sandy Powell
Cinderella – Sandy Powell
The Danish Girl – Paco Delgado
Mad Max: Fury Road – Jenny Beavan

وبصراحة هنا كان عندنا منافسة شرسة داخل عقلنا لمعرفة مين اللى ممكن يكون يستحق الجائزة، لإننا بنتكلم فى حوالى 4 أفلام من أصل 5 معتمدين على أحداث تاريخية، وبصراحة الأزياء اللى شوفناها فى معظم الأفلام دي كانت متميزة جدا، لكن فى رأينا إن Mad Max من جديد هو اللى هايكون قادر على حصد الجائزة فى منطقة أفضل تصميم أزياء، وده تميز شوفناه فى أحداث الفيلم واللى تم إختيار أزياء الفنانين المشاركين فيه بشكل قوي ومؤثر فى أحداث الفيلم نفسه.

أفضل تصميم للإنتاج

Bridge of Spies
The Danish Girl
Mad Max: Fury Road
The Martian
The Revenant

والبعض قد يتهمنا بالتحيز، لكن احنا برضو بنرشح Mad Max كأفضل تصميم إنتاج (أو إخراج فني زي ما كان إسم الجائزة قبل كده) لكن فى رأينا إن الفيلم يستحق الجائزة بسبب مستواه الفني المتميز واللى يجعله واحد من أفضل الأفلام خلال السنة.

أفضل تصوير سينمائي

The Hateful Eight – Robert Richardson
Carol – Ed Lachman
Mad Max: Fury Road – John Seale
The Revenant – Emmanuel Lubezki
Sicario – Roger Deakins

من بين  كل مشاهد مطاردة السيارات والإنفجارات وألعاب السيرك على صهوة السيارات المُعدلة.. مين أكتر ناس كانت بتنقل لنا الجو (الجحيمي) للأحداث؟ مافيش غير فريق تصوير Mad Max اللى نقدر نقول إننا على ثقة انهم هايحصدوا جائزة أفضل تصوير سينمائى فى أوسكار 2016

أفضل فيلم أجنبي

Embrace of the Serpent – Colombia
Mustang -France
Son of Saul – Hungary
Theeb – Jordan
A War – Denmark

وبنتمني … ونتعشم.. ونأمل.. إن الفيلم الأردني Theeb يفوز بجائزة أفضل فيلم أجنبي السنة دي.. والحقيقة لو فاز الفيلم، هاتكون نقلة قوية للأفلام العربية وتأكيد على قوتها وقدرتها على المنافسة وحصد الجوائز لحسابها، وعلى الصعيد الفني كمان الفيلم يعتبر واحد من أكتر الأفلام تميزاً وقوة فى 2015

أفضل فيلم رسوم متحركة

Anomalisa
Boy and the World
Inside Out
Shaun the Sheep Movie
When Marnie Was There

وبنعتقد إن الفيلم الفائز بالأوسكار هايكون Inside Out لإنه مش بس فيلم رسوم متحركة موجه للصغار، بل انه كمان بيخاطب الكبار من خلال الإسقاط السينمائى، كمان مستواه الفني وحبكته الجميلة والمختلفة، كلها أمور بتشجعنا على ترشيحة كصاحب أوسكار أفضل رسوم متحركة.

أفضل نص مقتبس

The Big Short – Charles Randolph and Adam McKay
Brooklyn – Nick Hornby
Carol – Phyllis Nagy
The Martian – Drew Goddard
Room – Emma Donoghue

وبنتوقع هنا فوز Room اللى ممكن يتم اختيار فوزه بالجائزة فى بعض الجوائز الفرعية، وتفريغ الصراع على جائزة أفضل فيلم لأفلام أقوي وأكثر قدرة على المنافسة، لكن مستوي فيلم Room الفني كان متميز وقادر على الصراع علي  الجوائز المختلفة.

أفضل نص أصلي

Bridge of Spies – Matt Charman and Ethan Coen & Joel Coen
Ex Machina – Alex Garland
Inside Out – Pete Docter, Meg LeFauve, Josh Cooley
Spotlight – Josh Singer & Tom McCarthy
Straight Outta Compton – Jonathan Herman and Andrea Berloff

وبنعتقد هنا ان Bridge of spies هايفوز بالجائزة، لقدرته على تحويل النص الأصلي اللى بيقدمه لفيلم متميز وقوي اشتغل عليه اتنين من أهم وأكبر الاسماء فى هوليود هم توم هانكس و المخرج ستيفن سبيلبرج

أفضل ممثلة مساعدة

The Hateful Eight – Jennifer Jason Leigh
Carol – Rooney Mara
Spotlight – Rachel McAdams
The Danish Girl – Alicia Vikander
Steve Jobs – Kate Winslet

وبنعتقد إن جنيفر جيسون فى The Hatefull Eight هاتحصد الجائزة بعد أداءها الخرافى وقدرة الفيلم على تغيير شكلها وطريقة تمثيلها بنسبة 180 علشان تتحول لإنسانة تانية اكثر شراسة وتكيفاً مع البيئة الصعبة اللى بتمثلها فى الفيلم.

أفضل ممثل مساعد

The Revenant – Tom Hardy
The Big Short – Christian Bale
Creed – Sylvester Stallone
Spotlight – Mark Ruffalo
Bridge of Spies – Mark Rylance

وبنعتقد ان توم هاردي عن The revenant هايكون له نصيب الأسد فى حصد الجائزة عن دوره المتميز وقدرته الغير عادية على تجسيد شخصية شريرة وصلنا معاها لمرحلة ما فى الأحداث اننا اصبحنا بنكره (توم هاردي) فعلا!

أفضل ممثلة في دور رئيسي

Room – Brie Larson
Brooklyn – Saoirse Ronan
Carol – Cate Blanchett
Joy – Jennifer Lawrence
45Years – Charlotte Rampling

بنعتقد هنا ان شواريز رونان هاتحصد الجائزة عن دورها فى فيلم (بروكلين)، وده لقدرتها غير العادية على أداء شخصية البنت المهاجرة بطريقة تحسد عليها، واستطاعتها الوصول بالفيلم لترشيحات الأوسكار السنة دي.

أفضل ممثل في دور رئيسي

The Revenant – Leonardo DiCaprio
The Danish Girl – Eddie Redmayne
Steve Jobs – Michael Fassbender
The Martian – Matt Damon
Trumbo – Bryan Cranston

بالنسبة لجائزة أفضل ممثل وجائزة أفضل فيلم، لازم نقول ان هايكون عندنا رأيين.. رأي بنتمناه.. ورأي بنعتقد إن ده اللى هايحصل على أرض الواقع.. يعني مثلا فى حالة أفضل ممثل فى دور رئيسي إحنا بنتمني إن (إيدي ريدماين) ياخد الجائزة عن فيلم The Danish Girl لانه قدر يأدي شخصية الرجل المتحول جنسياً بشكل رائع. لكننا بنتوقع إن الأكاديمية تعطي الجائزة لليوناردو ديكابريو عن The Revenant.

أفضل مخرج

The Big Short – Adam McKay
Room – Lenny Abrahamson
Spotlight – Tom McCarthy
Mad Max: Fury Road – Goerge Miller
The Revenant – Alejandro G. Inarritu

ومن تاني بيرجع معانا Mad Max اللى بنعتقد أن مخرجه جورج ميلر يستحق الجائزة، وإن كان أغلب الظن بيقول إن اللى هاياخد الجائزة هو اليخاندرو ايناريتو عن The revenant

أفضل فيلم

The Big Short
Bridge of Spies
Brooklyn
Mad Max: Fury Road
The Martian
The Revenant
Room
Spotlight

والأن مع الجائزة الأهم فى حفل توزيع الجوائز، ألا وهي جائزة أهم وأفضل فيلم فى 2015.. احنا نفسنا إن The Danish Girl يفوز وفى رأينا انه الفيلم الافضل فى 2015 نتيجة التمثيل المتميز والاخراج العظيم والقصة نفسها المقتبسة عن قصة حقيقية، لكن بنعتقد إن الجائزة هاتروح لفيلم ليوناردو ديكابريو The Revenant بعد حالة الجدل والترقب العالمي اللى حاصله بخصوص الفيلم وضرورة استحقاق بطله للأوسكار للمرة الأولى فى تاريخه…

ومن هنا لحد يوم اعلان الجوائز، هايفضل كل محبى السينما فى حالة ترقب وأختلاف حول الجائزة وحول الفائزين.. ايه رأيكم نفتح نقاش فى التعليقات عن توقعاتكم وأراءكم؟ احنا فى الأنتظار!