جراند أوتيل : الزمن الجميل فى درما حديثة فى رمضان
دايماً بنقول على أيام زمان إنها أيام الزمن الجميل.. لما كانت كل حاجة جميلة ومش معقدة.. الناس كانت كويسة وطيبة وماحدش بيأذي حد و … الحقيقة إن مسلسل جراند أوتيل واللى بيتعرض فى السباق الرمضاني 2016 بينسف الكلام الجميل اللى اتعودنا عليه لما بنيجي نتكلم عن الماضي، لإن المسلسل اللى بتدور أحداثه فى خمسينات القرن الماضي بيعرض لنا نمط مختلف تماماً من الشخصيات.
المسلسل بيحكي عن فندق (جراند أوتيل) واحد من أشهر وأجمل فنادق مصر فى الخمسينات، وبنشوف قصة شاب فقير ومغامر (عمرو يوسف) واللى بيبحث عن أخته اللى إختفت بشكل مفاجىء بعد عملها فى الفندق بفترة طويلة.
مسلحاً بشوية جوابات ومراسلات بينه وبين شقيقته، بينطلق (علي) علشان يحاول يكشف غموض إختفاء أخته، فقط علشان يبدأ فى إكتشاف سلسلة من العلاقات المتشابكة بين رواد الفندق وبين بعضهم، كمان بيقتحم عالم الخدم علشان يبدأ يكتشف مصايب وبلاوي كتير بتحصل بين كواليس الحياة فى الفندق.
أول حاجة لازم نعرفها عن المسلسل إنه بيقسم أبطاله لطبقتين.. طبقة البهوات والبكوات النزلاء فى الفندق، وبيدور بينهم صراعات على مناصب الإدارة فى الفندق وعلى أمور كتير بتخص طبقتهم اللى بتدور دايما حوالين المال والسلطة.
الطبقة التانية هى طبقة الخدم، وفى رأينا هى الطبقة الأكثر زخماً من ناحية الأحداث والصراعات، لإن طبيعة وجودهم فى خلفية الأحداث فى الفندق بنعرف من خلالهم تفاصيل كل شىء، بل على العكس أحياناً بنحس إن طبقة الخدم هم المحركين الاساسيين للأحداث.
أحمد داوود اللى بيلعب دور مدير الجراند أوتيل المُعين حديثاً واللى بيلعب على أكتر من بنت، إما بغرض إقامة علاقات جنسية عابرة مع الشغالات فى الفندق، أو محاولة الإرتباط بواحدة من أهم النزيلات (أمينة خليل) طمعاً فى أموالها، ومن الواضح إن (داوود) بيكرر من جديد دور الرجل (الوغد) اللى قدمها قبل كده فى (سجن النسا) على الرغم من نوعية الأدوار المختلفة اللى قدمها فى أعمال زي (قبل زحمة الصيف) أو (هيبتا) أو (أولاد رزق) وغيرها من المسلسلات أو الأفلام.
أفضل دور فى المسلسل فى رأينا بيذهب لدور محمد ممدوح أو أمين.. واللى بيشتغل خادم فى الفندق ويبدو من الأحداث إن هايكون له دور مهم ورئيسي فى أحداث المسلسل.
ممدوح قادر على جذب إنتباه واهتمام المشاهد من اللحظة الأولي، وكل كلمة وتصرف بيعمله قدام الشاشة بنحس فيه إنه ممثل قادر على الخروج من ثوبه تماماً وتقديم أداء تمثيلي أكثر من مدهش.. بداية من طريقة كلامه وحتي نظراته وانفعالاته.
من الأدوار اللى لفتت نظرنا أيضاً دور أمينة خليل أو نازلي، والحقيقة إن أمينة من الممثلات المتميزات واللى بنتوقع لهم مشاركات قوية فى المستقبل، خاصة مع جمالها البسيط والطبيعي، وقدرتها على تقمص أي دور بيطلب منها.
ديكورات المسلسل كانت قطعة من الجنة.. اهتمام غير عادي بالتفاصيل ونقلة زمانية متميزة للماضي بكل تفاصيله، والحقيقة إن أحمد شاكر مدير الديكور فى المسلسل قام بمجهود غير عادي علشان يظهر المسلسل بالشكل اللى ظهر عليه، لكن على الرغم من الإهتمام بديكورات المشاهد الداخلية، المشاهد الخارجية كانت قليلة ومحدودة إلي أقصي درجة، على الرغم من إنه كان من المفروض نشوف مشاهد أكتر من أسوان وطبيعتها الخلابة ومشاهدها الخارجية المتميزة.
جراند أوتيل لاعب أساسى ومنافس رئيسي على أفضل مسلسل فى رمضان 2016 ، ونعتقد إن الأحداث القادمة فى المسلسل هى اللى هاتحدد حاجات كتير جداً هاتخلينا نقول عليه فعلا أفضل مسلسل أم لا… انتوا ايه رأيكم؟
المسلسل بيتعرض على قناة سى بى سى دراما 10ص وسى بى سي العامة 5 ص، وايه ار تي حكايات 8ص.
من تأليف تامر حبيب وإخراج محمد شاكر خضير
من بطولة: عمرو يوسف – دينا الشربيني – أحمد داوود – محمد ممدوح سوسن بدر – أمينة خليل
من انتاج اروما والإخوة المتحدين و The Producers
