جريمة الإيموبيليا: هل الأقتباس عن قصة حقيقية كافي لنجاح الفيلم؟!
على الرغم من أقتباس فيلم (جريمة الايموبيليا) عن جريمة حقيقية حصلت في العمارة الشهيرة في وسط البلد، إلا أن أفلام الرعب والتشويق القوية محتاجه عوامل أكتر من كده علشان تنجح.
فكرة الفيلم خطرت في بال المخرج والمؤلف خالد الحجر من خلال اقامته في أحدد شقق العمارة، وشعوره ببعض الأمور الغريبة. حتى أنه قال أنه شاهد أطياف داخل الشقة في أحد المرات!
الفيلم بيحكي عن الكاتب كامل حلمي اللي بيقوم بدوره هاني عادل، واللي بيقيم في شقة في عمارة الايموبيليا، وبيدفعه مرضه النفسي للتورط في علاقة عاطفية مع بنت عرفها من خلال موقع الفيس بوك. ومن هنا بتبدأ الأحداث في التطور.
على الرغم من قوة القصة، لكن الأداء التمثيلي المبالغ فيه في معظم المشاهد من كل الابطال تقريباً كان سبب من أسباب شعورنا بضعف الفيلم. كمان ماقدرش الفيلم يقدم لنا صورة جديدة أو مختلفة لمنطقة وسط البلد اللي تعتبر من أغنى المناطق اللي ممكن يتم تصوير فيلم سينمائي فيها.
نقدر نقول أن طارق عبد العزيز هو الممثل الوحيد في الفيلم اللي كان اداؤه الى حد ما مش انفعالي أو عصبي. وطارق بدأ مؤخرا يطور من أداؤه من الكوميديا لمساحات واسعة جديدة ومختلفة بيعيد من خلالها اكتشاف نفسه كفنان متميز.
جريمة الإيموبيليا كان ممكن يكون فيلم أقوى لو كان تم الأهتمام بإظهار عناصر قوته بشكل أفضل من اللي شوفناه على الشاشة.
