حالة عشق : حالة متميزة فى رمضان
كلمة السر وراء نجاح مسلسل حالة عشق، مش المخرج ابراهيم فخر، على الرغم من التميز فى اخراجه للمسلسل، ومش فى تمثيل مي عز الدين المتقن، لكن فى راينا الشخصى ان نجاح المسلسل يرجع فى الاصل لكتابة محمد صلاح العزب للقصة، الكتابة المتقنة والتشويق الملعوب بحرفنة عالية، بيثبت فيها العزب قدرته على العزف على اوتار مختلفة، بعد تجربة اضعف مع مي عز الدين فى (دلع البنات) فى رمضان الماضى.
من معرفتنا الشخصية لمحمد صلاح العزب لازم نقول لكم توقعوا اى شىء منه.. هو كاتب على درجة عالية من الاحترافية وصعب جدا نستنتج خطوته القادمة.. التشويق فى المسلسل بيبدأ تقريباً من الحلقة الثانية لما بنكتشف ان مذيعة الراديو الناجحة (ملك) او مي عز الدين، بتعيش اكتر من حياه مع اكتر من شخص، منهم محامي ناجح (كريم فهمي) واللى بتسيبه فى قاعة الفرح اللى المفروض يقام فيها زواجهم وبتتزوج من شخص اخر (حازم سمير)، ثم بتبدأ سلسلة من الاحداث الغريبة فى حياتها.
بتتزامن الاحداث دي مع دخول صبري قليوب (احمد صيام) فى واحد من احسن ادواره كأب خارج من السجن حديثا وبيحاول يتأقلم مع حياته الجديدة ويرجع لأبنه وبنته (روجينا) واللى بتفاجأه بـ…. الصراحة احنا زهقنا من حرق الاحداث اكتر من كده. لكن عاوزين نقول لكم ان خيوط الاحداث متشابكه ومترابطه لدرجة كبيرة.. وياعالم صناع المسلسل ناويين علي ايه فى الحلقات القادمة.
روجينا بتكرر نفسها فى شخصية السيده العصبية طوال الوقت واللى بتزعق وتتهم الجميع بالفشل فى معظم مشاهدها، اما نورهان فا تقريبا قدمت افضل دور فى حياتها الفنية من خلال شخصية الفتاة الشريرة بشكل مستتر ومقنع تحت ستار البنت الطيبة.. الراقصة بوسى بتقدم دور قوي ومؤثر علي عكس توقعاتنا، اما النجمة بوسى فا حسينا ان دورها كان باهت على الرغم من بعض المشاهد القوية.
بنعيب على المسلسل كثرة الاستعراضات والرقصات والاغاني اللى بيتم تقديمها، سواء على سبيل الحشو لتطويل فترة عرض الحلقة او لجذب شريحة جديدة من المشاهدين.. المسلسل ناجح من غير حاجه ومكانش محتاج كل هذا الاغراق فى الاستعراض حتي لو موظف دراميا بشكل كويس، لكن حتي الان لم نشاهد اى مشاهد خارجه او خادشه للحياء، او ايحاءات جنسية او الفاظ خارجه، ونتمني المسلسل يستمر كده للنهاية.
حتي الان.. حالة عشق واحد من احسن مسلسلات رمضان 2015 .. تحية لمحمد صلاح العزب الكاتب ومي عز الدين البطلة و ابراهيم فخر المخرج
