حق ميت : رومانسية وغموض فى دراما رمضان
بعد النجاح الساحق اللى حققه التعاون الفني بين ايمي سمير غانم، وبين الفنان حسن الرداد، فى فيلم (زنقة ستات) يبدو ان صناع مسلسل (حق ميت) قرروا استغلال النجاح ده فى انتاج عمل درامي رومانسى مُطعم بالاكشن والغموض يعرض فى رمضان الحالى.. لكن هل حقق المسلسل نفس النجاح اللى حققه الفيلم؟!
الاجابة هى : لا. لان جمهور الدراما غير جمهور السينما، واللى تقدر تقدمه للناس فى ساعة ونصف مختلف بشكل كبير عن اللى تقدر تقدمه للناس فى 30 حلقة مدة كل منها حوالى 40 دقيقة لمدة 30 يوم على عدد قنوات كبير.
المسلسل بيبدأ حلقاته الأولى بخبر القبض على سفاح دوخ الداخلية، واهتمت بتغظية اخباره وسائل الاعلام وبرامج التوك شو.. حالة من الغموض بتغلف خبر القبض على السفاح قبل ما نكتشف انه (حسن الرداد) او نادر مصطفى كمال.. المحامي واللى بيتم اقتياده لوزارة الداخلية للتحقيق معاه بمعرفة اللواء عادل هلال او الفنان احمد عبد العزيز واللى بيظهر من جديد على الشاشة بعد غياب طويل، وفى عدد كبير من الاعمال الدرامية السنة دي.
المسلسل بيسير بينا فى اكتر من مسار.. الاول والاساسى هو استرجاع (الرداد) لعلاقته بايمي سمير غانم، ومن هنا بيبدأ الخيط الرومانسى فى المسلسل، ومن ناحية تانيه بنشوف مسار تاني للحروب الاعلامية وحروب برامج التوك شو، وده خيط جانبى نتوقع ان هايتم الاهتمام بيه اكتر من كده فى الاحداث القادمة.
ايمي سمير غانم من الواضح انها اكتسبت شوية وزن زياده، بالاضافة انها مش لايقه الى حد ما فى الدور الرومانسى على الرغم من ملامحها وطريقه تعاملها وكلامها –فى الشخصية- واللى جعلتها قريبه من اى بنت مصرية عادية، لكن نعتقد ان الدور لسه مش ملائم لها بنسبة 100%
احمد عبد العزيز بيؤدي دوره بكتير من المبالغه، وعلى الرغم من اشتياقنا لعودته للتمثيل مره تانيه لكن المبالغه فى اداؤه ضايقتنا لدرجة كبيره، ولو هانتكلم عن سلبيات اخري فى الاداء التمثيلي لباقى الابطال لازم نقول ان الفنانة سورية الاصل (ناندا محمد) ادت دورها بشكل سىء للغاية، والدور كان محتاج فنانة تانيه خالص علشان تقوم بيه.
حسن الرداد بيثبت اقدامه يوم بعد يوم فى عالم التمثيل.. اداؤه لسه فيه بعض الديفوهات لكن نقدر نقول ان الوضع بيتحسن معاه بشكل افضل حتي لو كان ببطء ، والمسلسل بالكامل يقع فى خانة المسلسلات المتوسطة اللى ممكن يفوتك منها حلقتين تلاته وترجع تكمل مشاهده كان مافيش حاجه فاتتك ماعدا طبعا بعض الحلقات المحورية زي الحلقة الحادية عشر مثلا.
حق ميت مسلسل تليفزيوني تشوفه لو مش لاقى حاجه تانيه تشوفها.. مش أسوأ مسلسل ومش احسن مسلسل. وكنا نتوقع المزيد من فريق عمله خصوصا بعد نجاحهم فى (زنقة ستات).
