خلاويص: الكوميديا السوداء في مصر
على الرغم من صعوبة تصور أن قصة زي قصة (خلاويص) تحصل بشكل حقيقي في مصر، إلا أنه ساعات الحقيقة بتكون أغرب من الخيال.. تعالوا نتعرف أكتر على قصة فيلم خلاويص.
القصة
خلاويص مأخوذ عن قصة حقيقية عن طفل صغير بيتم اتهامه بجريمة كبيرة نتيجة تشابه في الأسماء بينه وبين مجرم ثاني. بيضطر والد الطفل أنه يعترف بجريمة لم يقم بيها علشان يكون بجوار أبنه في الموقف الصعب اللي هو فيه، وكل الأحداث دي بنشوفها في اطار كوميدي ينتمي لفئة الكوميديا السوداء.
فريق العمل
الفيلم من بطولة أحمد عيد وأيتن عامر والطفل أدم وهدان و طارق عبد العزيز ومحسن منصور وأحمد فؤاد سليم، ومن تأليف فيصل عبد الصمد وإخراج خالد الحلفاوي
الأداء التمثيلي
أحمد عيد قدم في الفيلم أداء تمثيلي متعودين عليه منه، وهو نفس الأداء اللي بيقدمه في كل أفلامه تقريبا بدون أي زيادة أو نقصان، أما الطفل أدم وهدان فا قدر يقدم أداء ممتاز ومتناسب مع الفترة العمرية اللي بيقوم بيها من خلال احداث الفيلم.
طارق عبد العزيز قدم أداء غير موفق في شخصية الأعلامي، على الرغم من تحمله جزء كبير من الكوميديا في الفيلم، وأخيرا أداء أيتن عامر كان جيد ومتناسب مع الشخصية اللي بتقوم بيها.
السيناريو والحوار والأخراج
سيناريو الفيلم كان مترابط وقوي وقادر على خلط الكوميديا بالدراما بشكل جيد وبدون ما يشعر المشاهد بالملل، وبشكل يرضي جميع المشاهدين اللي بيتفرجوا على الفيلم، أما الحوار فوقع عليه العبء الأكبر لتوليد المشاهد الكوميدية في الفيلم وقدر يقوم بمهمته على أكمل وجه.
الديكورات والموسيقى والأزياء
ديكورات الفيلم جيدة واختيار زوايا التصوير ودرجات الأضاءة كان من العوامل المهمة واللي ساعدت على شعورنا بالفيلم وتذوقنا لمشاهده بشكل جديد ومختلف ومريح للعين.
الخلاصة
فيلم خلاويص فيلم ينتمي لفئة الكوميديا السوداء وهي فئة مش منتشرة بشكل كبير في مصر. وبننصح بمشاهدته
علشان تبقى عارف:
الفنان أحمد عيد تخصص في نوعية أفلام الكوميديا السياسية زي فيلمه ليلة سقوط بغداد وغيرها من الأعمال
