مقالات كايرو 360

خمس أفلام مرعبة تشوفهم ليلة الهالوين

قراءة سهلة

ليلة ٣١ أكتوبر من كل سنة، بيحتفل العالم بعيد الهالوين، أو عيد الرعب حسب الترجمة العربية للكلمة. الطقوس الأساسية في عيد الرعب، هي مرور الأطفال على البيوت علشان يحصلوا على الحلويات، وتنظيم الحفلات التنكرية، وطبعا: مشاهدة الأفلام المرعبة. سواء في السينمات أو البيوت.

كايرو ٣٦٠ بترشح لكم خمس أفلام مرعبة، هاخلي ليلة الهالوين بالنسبة لكم ليلة مختلفة، وتستحق اسمها.

Smile

 

الابتسامة دايما دليل على الود والحب والتفاؤل، لكن فيلم Smile أعطى الابتسامة والضحكة الواسعة المرسومة على الوجه بُعد مختلف تماما، من خلال حالة استحواذ شيطاني بتسيطر على بعض الأشخاص بشكل غامض، بتخليهم يبتسموا بشكل مرعب قبل ما يرتكبوا جرائم فظيعة. ومحاولة طبيبة نفسية كشف غموض الأحداث المرعبة، والنجاة بروحها وأمانها النفسي في نفس الوقت.

The Invisible Man

مش بنحب نرشح أفلام تعتبر Remake أو إعادة انتاج لأعمال قديمة، لكن في حالة The Invisible Man نجح الفيلم في منافسة الفيلم الأصلي المقتبس عنه. واستغلال فارق التكنولوجيا والخدع والمؤثرات لصالحه.

فيلم The Invisible Man بيلعب على تيمة “الخوف من الحاجات اللي مش قادرين نشوفها” من خلال رحلة امرأة شابة بتهرب من علاقة سامة، وبتحاول تستعيد حياتها السابقة، لحد ما تكتشف أن حبيبها تحول لشخص غير مرئي، وبيطاردها علشان ينتقم منها بأفظع طريقة.

Annabelle

 

على مدار عقود، كانت العاب الأطفال والدمى من أكتر الحاجات اللي بتدخل السرور في قلوب الأطفال والكبار على حد سواء، لحد ما يستلم صناع الرعب حوالين العالم التيمة دي، وتتحول الدمى لمرادف للشر الشيطاني الساكن في أعماقها. وفيلم Annabelle – المستمد عن قصة حقيقية- هو خير دليل على أن مش كل عرائس الأطفال بتكون طيبة وتعتبر هدية جميلة.

Fall

 

فيلم Fall بيعلمنا حكمتين في غاية الأهمية: الأولى أن مش كل أفلام الرعب عن الشياطين والأشباح والوجوه المبتسمة، والثانية أن مش كل رحلات تسلق الأماكن العالية بتنتهي بشكل جيد. بل على العكس بعضها ممكن يتحول لكارثة!

فيلم Fall بيحكي عن بنتين بيقرروا يتسلقوا قمة برج اتصالات عالي جدا، لكن مع تعرضهم لموقف طارئ وفشلهم في النزول من البرج، بتتحول الرحلة اللطيفة لجحيم حقيقي.

Searching

 

الأن وقد أصبحتم مرعوبين من الأشخاص المبتسمة، والأشخاص اللي عندها القدرة على الاختفاء، والدمى المخيفة، والأماكن المرتفعة. هاييجي في بالكم أنكم تقضوا اليوم أمام الكمبيوتر بدون الاحتكاك بأي شخص. فقط علشان ييجي فيلم Searching ويعرفكم أن مجرد جولة تصفح عادية على الانترنت ممكن تتحول لكابوس.

Searching بيحكي عن أب بيحاول يعرف مكان اختفاء بنته، من خلال تعقب خط سيرها الكترونيا، فقط علشان يكتشف كمية حقائق مرعبة مكانش يعرف أنها بتحصل حواليه.

زر الذهاب إلى الأعلى