خمس مسلسلات ما تتفوتش على منصة شاهد
من بداية تأسيسها واحنا عندنا كل المشاعر الإيجابية ناحية منصة شاهد، كمنصة عربية خالصة مدعومة برأس مال كبير علشان تقدم للمشاهد العربي محتوى محترم يليق بيه، وتنافس تطبيقات مشاهدة ضخمة بحجم أبل تي في+ أو نتفليكس. إضافة المشاهد العربي كان عايزها ويستحقها.
ومع الوقت أصبح المحتوى على شاهد ضخم جدا، علشان كده حبينا نرشح لكم ٥ مسلسلات تستحق المشاهدة على المنصة. تعالوا نتعرف عليها أكتر.
سيب وانا اسيب
مسلسل كوميدي ١٠ حلقات متوفر بكل حلقاته على شاهد، عن الصراع بين الانفلونسر بيلا الجندي (هنا الزاهد) وجوزها (أحمد صلاح السعدني) واللي بينتج عنه سلسلة لا تنتهي من المواقف الكوميدية.
المسلسل من تأليف رنا أبو الريش وإخراج وائل إحسان وبيشارك في البطولة أيه سماحة و محمد جمعة وعارفه عبد الرسول وغيرهم.
موضوع عائلي
موضوع عائلي هو مسلسل مصري اجتماعي كوميدي، مكون من موسمين، بإجمالي ٢٢ حلقة. عن قصة الشيف إبراهيم (ماجد الكدواني) اللي بيعرف أن بنته اللي اتحرم من أنه يشوفها سنين طويلة (رنا رئيس) بتتعرض لمشاكل كتير ومحتاجاه يكون جنبها.
إبراهيم بيقرر يقف جنب بنته بس بدون ما يعرفها العلاقة بينهم علشان ما يعملهاش صدمة. ومن هنا بتبدأ سلسلة من المواقف الكوميدية اللي بتمتد على الموسمين الخاصين بالمسلسل وبتعيشنا معاهم جو كوميدي مختلف.
موضوع عائلي من تأليف وإخراج أحمد الجندي وبيشارك في بطولته سما إبراهيم ومحمد شاهين ومحمد رضوان.
ليه لاء الجزء الثالث؟!
ناخدكم من الكوميديا شوية للمسلسلات اللي بتناقش قضايا اجتماعية. ليه لاء في موسمه الثالث، بيحكي عن شيري (نيللي كريم) اللي بتعيش بعد انفصالها عن جوزها علشان تربي أولادها، ياسمين وياسين (فريدة رجب و معتز هشام)، ثم بتتعرف على طبيب بيطري (أحمد طارق)، وبيقرروا يتجوزوا.
لكن معارضة الابن المراهق بتحول حياة الأسرة كلها لجحيم، وبتعمل سلسلة من المواجهات نقدر نعتبرها العامود الفقري لـ ١٥ حلقة هتلاقي نفسك بتتفرج عليهم ورا بعض علشان تعرف أيه اللي هايحصل.
ليه لاء من تأليف مريم نعوم وإخراج نادين خان وبيشارك البطولة صلاح عبد الله و أمير صلاح ونادين وحنين سعيد.
الغرفة ٢٠٧
ولو فاكرين أن كل اللي معانا كوميدي واجتماعي بس تبقوا غلطانين..
مسلسل الغرفة 207 هو واحد من أقوى مسلسلات الرعب المصرية، مقتبس عن قصة للدكتور أحمد خالد توفيق، ومن اخراج محمد بكير.
المسلسل بيحكي عن جمال الصواف (محمد فراج)، اللي بيشتغل في فندق منعزل فيه غرفة مسحورة، اللي بيحصل فيها بجد كفيل أنه يخلي أي حد شعره يشيب.
مع الوقت جمال بيكتشف أن عمله في الفندق مش مصادفه، وأن وجوده له علاقة بأحدث ما ورائية غريبة تم تجسيدها على الشاشة ببراعة.
بيشارك في بطولة الغرفة ٢٠٧ ريهام عبد الغفور و ناردين فرج و مراد مكرم ويوسف عثمان وغيرهم كتير.
النزوة
وأخيرا، مسلسل النزوة، اللي ممكن نعتبره مسلسل بيجمع بين الرومانسية والغموض مع شوية أكشن، عن عمر شاهين (خالد النبوي) اللي بيتورط في علاقة مع واحده بتشتغل في مطعم (عائشة بن احمد) مع عدم علم زوجته (سالي شاهين)، وسلسلة من المواقف المعقدة والمركبة اللي بتحصل نتيجة العلاقة دي، وازاي تطورات الأحداث ممكن تؤدي لجريمة، تخلي الشرطة -واحنا معاها- متورطين في ١٥ حلقة من محاولة فك لغز الجريمة، ولغز قصة الحب الأغرب.
بيشارك في بطولة (النزوة) عمر الشناوي و مراد مكرم وغيرهم من الأبطال.
