خير وبركة: كوميديا العيد الكبير

نجوم مسرح مصر ممكن نختلف معاهم في حاجات كتير على الصعيد الفني، لكن ماينفعش ننكر أنهم أسسوا لنفسهم موجة من الكوميديا وحجم كبير من الجمهور اللي بيدخل أفلامهم بدون تفاهم. ودي تجربة مهما اختلفنا معاها لازم نحترمها ونرصدها.

القصة

الفيلم بيحكي عن شابين بيحاولوا يحضروا حفلة لهيفاء وهبي علشان يتصوروا معاها، لكن علشان يحققوا هدفهم بيقعوا في سلسلة لا تنتهي من المواقف الكوميدية اللي مالهاش أول من أخر.

فريق العمل

الفيلم من بطولة على ربيع ومحمد عبد الرحمن و تارا عماد و مي سليم وبيومي فؤاد وسيد رجب. ومن اخراج سامح عبد العزيز وتأليف جورج عزمي عن فكرة على ربيع.

الأداء التمثيلي

الأداء التمثيلي لكل فريق عمل الفيلم كان نمطي، وكأنهم بيقولوا للمشاهدين :احنا عارفين انتوا متوقعين منا ايه وهانعطيكم ده بدون زيادة أو نقصان، والحقيقة ان دي حاجه تحترم في الأداء التمثيلي للابطال لانهم قدروا يعطونا جرعة الكوميديا بدون زيادة أو نقصان أو محاولات للفذلكة وحشر قضايا مهمة او رسالة للفيلم!

السيناريو والحوار والأخراج

سيناريو الفيلم كان كله ايفيهات كوميدية من اول مشهد لأخر مشهد تقريبا، وده على الرغم من أنه جيد بالنسبة لفيلم كوميدي، لكنه ألقى كل العبء الكوميدي على الحوار، وده كان في غير مصلحة الحوار اللي وجد نفسه عليه عبء نجاح الفيلم بالكامل تقريبا. أما اخراج الفيلم فكان عارف نوعية جمهور العيد من الشباب والمراهقين ومن محبي نجوم مسرح مصر وكان عارف يقدم لهم الوجبة الكوميدية المعتادة باقتدار.

الديكورات والموسيقى والأزياء

ديكورات الفيلم كانت قوية ومؤثرة، وكمان الأزياء، لكن موسيقى الفيلم ضعيفة وغير مؤثرة اطلاقا على الرغم من محاولة الموسيقى انها تقدم بعض اللحظات المؤثرة، لكن واضح أنها كانت في أخر اهتمامات صناع الفيلم.

الخلاصة

خير وبركة فيلم مثالي للشباب المراهق والأطفال ومحبي نجوم مسرح مصر.

علشان تبقى عارف:

الفيلم يعتبر ثاني فيلم من بطولة علي ربيع بعد فيلم (حسن وبقلظ) عام 2016.