دعدوش: السخرية من التطرف الديني

المنطقة العربية بشكل عام ومصر بشكل خاص من المناطق اللي بتعالج كتير من مشاكلها السياسية والاجتماعية من خلال السخرية والكوميديا، ومن قديم الزمان والكوميديا أثبتت قدرتها على البقاء وتحدي القوة والجبروت.

واليوم ومن خلال فيلم دعدوش بنشوف محاولة ساخرة لانتقاد جماعات التطرف الديني، تعالوا نتعرف على الفيلم عن قرب.

القصة

الفيلم بيحكي عن شاب بيجد نفسه فجأة منخرط مع تنظيم إرهابي متطرف، بعد ما بيشوف اعلان هزلي على الأنترنت بيدعو الشباب للانضمام للجماعة المسلحة، ومن خلال انضمام بطلنا للجماعة بنشوف الوسائل اللي بتتبعها التنظيمات المتطرفة علشان تضمن ولاء أفرادها، لكن كل ده في اطار من الكوميديا والسخرية.

فريق العمل

دعدوش من بطولة هشام إسماعيل و ميرهان حسين ومدحت تيخا وأيمن أبو زهرة و ياسر الطوبجي والفيلم من اخراج عبد العزيز حشاد وتأليف ساهر الأسيوطي.

الأداء التمثيلي

على الرغم من أن فكرة الفيلم جيدة لكن تنفيذها كان ضعيف، وخاصة على مستوى الأداء التمثيلي اللي كان متواضع وغير مؤثر، وكان واضح أن الممثلين عندهم خلط بين الكوميديا وبين الاستهتار بالمشاهد الخاصة بهم، علشان كده ظهر الأداء التمثيلي ضعيف وكان محتاج زيادة دعم من الإخراج والسيناريو.

السيناريو والحوار والأخراج

سيناريو الفيلم غير ممل وبينقلنا من مشهد للتاني بسرعة وسهولة، لكن الإخراج كان عنده مشكلة حقيقية في توظيف عناصر الفيلم لخدمة الكوميديا اللي كانت ضعيفة وغير مؤثرة وغير مضحكة في كتير من المشاهد.

الديكورات والموسيقى والأزياء

من الصعب أننا نناقش موسيقى وديكورات فيلم زي دعدوش لأن الاهتمام بالعناصر دي كان اقل ما يكون في الفيلم وده من الأمور اللي بناخدها على الفيلم وصناعه، وبشكل عام الفيلم لم يكن بالقوة اللي كنا نتوقعها على مستوى الديكور والموسيقى والأزياء.

الخلاصة

دعدوش فيلم فكرته كويسه لكن تنفيذه كان ضعيف وكان محتاج وقت أطول واهتمام اكبر

علشان تبقى عارف:

الرقابة حذفت بعض مشاهد الفيلم وكان من ضمنها مشهد عن الباحث اسلام البحيري.