دليل أفلام عيد الفطر 2016
يعني ايه عيد الفطر؟ يعني كحك وبسكويت و بيتي فور وزيارات عائلية… يعني ايه زيارات عائلية؟ يعني عيديات… فلوس… كاشات… والفلوس يعني فسح… والفسحة ماتبقاش فسحة منغير سينما.. والسينما ماتبقاش سينما منغير ما كايرو360 تقول لك الخريطة الكاملة لأفلام عيد الفطر 2016.. الموضوع ده تقراه قبل السينما وبعدها… قبلها علشان تعرف هاتدخل فيلم ايه.. وبعدها علشان نتناقش سوا هل اختياراتنا وترشيحاتنا كانت صح ولا لاء.
أبو شنب.. فيلم رومانسى كوميدي أكشن عائلي اجتماعي!
نبدأ جولتنا مع فيلم أبو شنب من بطولة الفنانة خفيفة الظل اللى أصبحت مقررة علينا فى كل عيد (ياسمين عبد العزيز). الحقيقة أن ياسمين بتحاول تجد لنفسها منطقة تحتكر تقديم أعمالها فيها، حاولت قبل كده مع أفلام (الداده دودي) و (الأنسة مامي) أنها تفتح قناة أتصال مع الأطفال، وحاولت بعد كده أنها تقدم سلسلة أفلام بتجمع كل حاجه مع بعضها ما بين الأكشن والرومانسية أو حتي الأغاني والأستعراضات، وده حصل فى أفلام زي الثلاثة يشتغلونها و جوازه ميري وأخيرا… أبو شنب.
الفيلم بيحكي عن ظابطة فى الشرطة النسائية المصرية، بتتعرض لمواقف كوميدية كتير بالأشتراك مع ظافر العابدين، مع مشاهد كتير شوفناها فى تريلر الفيلم بتحكي عن التحرش ومحاولة مواجهة الظاهرة دي بإسلوب كوميدي.
الفيلم بيشارك فى بطولته لطفي لبيب و بيومي فؤاد الجوكر اللى ظهر فى معظم مسلسلات رمضان وأفلام العيد بالأضافة لبدرية طلبة و ليلي عز العرب ومن أخراج سامح عبد العزيز. وممكن تشوفوا اعلانه من هنا
جحيم فى الهند… جحيم فى السينما
بعد النجاح اللى حققه فيلم كابتن مصر، محمد أمام ابن الفنان الكبير عادل إمام بيقدم فيلم جديد بعنوان (جحيم فى الهند) من إخراج معتز التوني اللى اشتهر عنه إخراج النوعية الخفيفة من الأفلام اللى بتتعرض فى سباق الأعياد دايماً.
الفيلم بيحكي عن فرقة قوات خاصة بتحاول تحرر السفير المصري المخطوف فى الهند، لكن الأحداث بتاخد منعطف كوميدي أكتر منه منعطف أكشن، مع وجود فرقة كوماندوز غريبة بتضم باقى أبطال الفيلم زي بيومي فؤاد –تاني- و أحمد فتحي وحمدي الميرغني مع بطولة نسائية من ياسمين صبري اللى عملت دور تمارا فى مسلسل الأسطورة فى رمضان. وممكن تشوفوا اعلان الفيلم من هنا
عسل أبيض.. الأطفال أحباب الله.. والسينما
ولأن الأطفال بيحبوا السينما والسينما بتحب الأطفال، وعلشان الأهل عاوزين فيلم يضحك أولادهم بعد القعاد لمدة 30 يوم فى انتظار المسلسلات على القنوات والدوخة من الإعلانات والفواصل، سامح حسين مع المخرج حسام الجوهري بيقدمولنا فيلم خفيف موجه بالمقام الأول للأطفال.
الفيلم بتدور أحداثه عن طفل صغير بيتعرض للأختطاف وبتحصل مفارقات كوميدية كتير علشان الطفل ده يرجع لعيلته تاني، وبيشارك فى بطولة الفيلم ميرهان حسين و بيومي فؤاد –تالت!- ونهي صالح و كريم عفيفي. وممكن تشوفوا اعلان الفيلم من هنا
بارتي فى حارتي.. 30 يوم فى العز
وهنا نوصل لمحطه مش بنحب نقف عندها كتير فى الكلام عن أفلام العيد.. ألا وهي الأفلام الهابطة واللى كل هدفها تقديم الرقص والعري فى اطار درامي مبتذل من النكت السخيفة والإيفيهات الواقعة.. دي أفلام بتقاس جودتها بكمية اللحم العريان فيها، وقدرتها على جذب المشاهدين بتعتمد فى المقام الأول والأخير على الجمهور المراهق اللى مش عاوز يشوف غير الرقاصة والمطرب والكباريه والحارة الشعبية والسلام.
الفيلم الأول هو (بارتي فى حارتي) وممكن تشوفوا اعلانه من هنا من تأليف أحمد عيسي وبطولة ايمان السيد والمطرب دياب و المطربة أمينه والراقصة دينا ومحمد لطفي اللى زعلانين جدا على اصراره على تضييع موهبته التمثيلية الممتازة فى أفلام بالشكل ده.
الفيلم بيحكي عن محمد لطفى واللى بيظهر كشخص عنده قدرات خارقه ورثها عن والده (ايرون مان) وهى قصة بتفكرنا بدرجة كبيرة بقصة (بنات سوبر مان) المسلسل الرمضاني.
أما الفيلم التاني فا هو فيلم 30 يوم فى العز وتقدروا تشوفوا اعلانه من هنا وهو قصة وسيناريو وحوار سيد السبكي واخراج هاني حمدي ومن بطولة سليمان عيد وأحمد فلوكس و سعد الصغير والراقصة صوفينار
الفيلم بيحكي عن حارة مصرية وقصة حب بتنشأ بين شاب وشابة من سكان الحارة والمواقف الكوميدية اللى بتظهر نتيجة العلاقة دي.
من30 سنه… الأحلي فى الأخر
ولأن الأحلي دايما بنحب نتكلم عنه أخر حاجه… بنتوقع لفيلم من 30 سنه انه يكون قنبلة مدوية فى عيد الفطر 2016 .. الفيلم من بطولة أحمد السقا وشريف منير و مني زكي وميرفت أمين و نور وصلاح عبد الله ومن تأليف أيمن بهجت قمر وأخراج عمرو عرفه.
الفيلم بيحكي عن رجل بيحلم انه بيقتل ناس معينة، ولما بيصحي بيقتلهم فعلا، وبيكتشف أنه تعرض لما يشبه اللعنه، واللى بترفض أنها تسيبه.. علشان كده بيلجأ لمساعدة من صديقه (أحمد السقا) واللى بيحاول يساعده. واعلان الفيلم تقدروا تشوفوه من هنا
شاركونا فى تعليقاتكم وفى السوشيال ميديا بتاعتنا برأيكم فى أفلام العيد السنة دي، وايه توقعاتكم لأفضل الأفلام اللى شوفتوها فى الموسم ده
