سبوبة: فعلاً سبوبة!
طول عمرنا من عشاق المخرج المجنون “كوينتن ترانتينو” اللى قدم لنا عدد قليل من الأفلام لكنه مؤثر وبنحب نشوفه من وقت للتانى ، “سبوبة” فيلم مقتبس من أول أفلام ترانتينو بعنوان Reservoir Dogs، ناهيك أن الموسيقى التصويرية للفيلم مأخوذة عن فيلم Inception، لكن هل جاءت قوة الاقتباس من الأعمال دى بنفس قوة الأعمال الأصلية؟
الإجابة هى “لأ” قوية ومجلجلة.. وبـ نقولها بأعلى صوتنا بدون أدنى قدر من تأنيب الضمير بعد حفلة التعذيب اللى مرينا بها لمدة ما يقرب من ساعة ونصف هى زمن الفيلم قضيناها فى حالة من الملل والزهق وارتفاع ضغط الدم إلى درجة لا تقارن.
القصة اللى مش هـ نقدر نحكيها لأنها ظهرت على الشاشة مهلهلة وضعيفة وغير مترابطة على الإطلاق، والأبطال أحمد هارون وراندا البحيرى وغيرهم ظهروا بشكل أقل من قدراتهم لما كانوا بـ يقدموا أدوار الصف الثانى أو حتى الثالث.
المخرج بيتر ميمى وده عمله الإخراجى الأول حسب علمنا لا يشفع له كونها تجربته الأولى فى الإخراج أنه يقدم لنا فيلم بالشكل اللى شوفناه ده.. نصحنا كل اللى قابلنا بعد نهاية الفيلم بعد مشاهدته، وبـ ننصحك أنت كمان توفر فلوس تذكرتك لأى فيلم ثانى أفضل من كده.
