سقوط حر: من أحسن مسلسلات رمضان 2016
نيللي كريم فى البطولة ومريم نعوم فى التأليف… الثنائي ده لما بيشتغلوا مع بعضهم بيقدموا لنا فى النهاية أعمال فى غاية الروعة والتميز.. بداية من سجن النسا، مروراً بـ( تحت السيطرة) وطبعا ما نقدرش ننسى (حكاية بنت اسمها ذات) واللى كتبت السيناريو والحوار له نعوم وقامت ببطولته نيللي كريم.
وبما اننا بنتكلم عن (تيمة) معينة من المسلسلات نقدر نقول إن نعوم وكريم بيقدموا من جديد توليفة جديدة وعرض جديد لفكرة : قصة مجموعة من السيدات فى مكان مغلق ومختلف… مرة تم تقديم القصة فى السجن فى مسلسل (سجن النسا) ومرة فى مصحة نفسيا فى (سقوط حر).. وهو ده اللى بنتكلم عنه.
المسلسل بيبدأ بمشاهد إفتتاحية لجريمة قتل.. كده بدون إحم أو دستور! البوليس بينتقل لشقة فى التجمع الخامس علشان نكتشف قيام سيدة فى منتصف العمر (نيللي كريم) بقتل زوجها وأختها! وبيبدو من المشاهد الأولي للأحداث إن الزوج المقتول كان على علاقة عاطفية بالأخت المقتولة!
بيصحبنا المسلسل بعد كده فى رحلة لما وراء حادث القتل.. بنشوف تأثير الحادث على عائلة نيللي كريم، سواء كانت الأم صعبة المراس واللى قدمت أداء تمثيلي متميز (صفاء الطوخي) أو الإبن (أحمد داش) واللى قدم أداء متميز قبل كده فى فيلم (لامؤاخذة) وغيرهم من باقي أبطال المسلسل.
بعد كده بياخدنا المسلسل فى رحلة فى عالم المرض النفسي، وإزاي ممكن يتحول المريض نفسياً لشخص خطر على غيره، وده بنعرفه من قصص باقي المحتجزين فى مستشفى الصحة النفسية فى العباسية، انتظاراً لعرضهم على الهيئة اللى بتحدد مدي مسئوليتهم عن جرائم القتل اللى ارتكبوها.
الأجمل من القصة المكتوبة بانسجام شديد وبتدقيق فى التفاصيل، الأجمل كان فى الأداء التمثيلي للمتميزة نيللي كريم، واللى قدرت تقدم أداء تمثيلي متميز قالت عنه فى حوار مع (المصري اليوم) إنه كاد يصيبها بالجنون فعلياً، ويكفي إننا نعرف إن نيللي قضت أول حلقات فى المسلسل بدون ما تقول كلمة واحده حتي!
لكن بما إننا بنتكلم عن الأداء التمثيلي لازم نتكلم عن صفاء الطوخي اللى قدرت تقدم أداء متميز للغاية، و أحمد داش اللى على الرغم من صغر سنه قدم تمثيل متميز، وبنتوقع إن (داش) لو استمر فى عالم التمثيل هايكون إسم متميز جداً فى المستقبل.. أما أخر تعليقاتنا عن الأداء التمثيلي هاتكون عن أحمد وفيق واللى حسينا إن الدور كان كبير عليه، وأن أداؤه التمثيلي كان محتاج يكون أقوي خاصة فى مواقف الإنفعال اللى حسينا فيه إن انفعالاته كانت مش بالقوة الكافية اللى تنقل لنا إحساس الشخصية اللى بيأديها.
الإهتمام بإخراج مشاهد المسلسل باتقان واحترافية كان متميز، بنشوف مشهد غرق نيللي كريم فى غرفتها فى مستشفى الأمراض العقلية، واللى أذاعت قناة CBC مؤخراً مشهد للـ(ميكنج) الخاص بالمشهد واللى ممكن تشوفوه من هنا واللى بنشوف منه إزاي ممكن مشهد مش بيستمر على الشاشة أكثر من ثواني معدودة إنه يتم الإعداد له بالدقة والإحترافية دي.
سقوط حر واحد من أفضل مسلسلات رمضان 2016 إن لم يكن أفضلهم… قولوا لنا فى التعليقات عن أكتر المشاهد اللى علقت فى ذاكرتكم من المسلسل.
