شيخ جاكسون: عن مراهقتنا الجميلة رغم كل شيء!

في يونيو 2009 تم الإعلان عن وفاة المطرب الأشهر في العالم (مايكل جاكسون)، وفي رأينا هو ده كان التاريخ اللي بدأ عمرو سلامة التفكير في تقديم فيلمه (شيخ جاكسون)، اللي بيعبر في أول ما يعبر عن جيل كامل يعتبر عمرو سلامة وأحمد الفيشاوي من الناس اللي عاشوا أحداثه بنفسهم.

القصة

الفيلم بيحكي عن يوم وفاة مطرب البوب العالمي مايكل جاكسون، واللي بيعيد في ذهنه سلسلة من الأحداث بتتزامن مع فترة المراهقة الطايشه اللي مر بيها، وحبه لشخصية مايكل جاكسون وحبه لتقليده في كل تصرفاته.

الفيلم بعد كده بيستعرض معانا ازاي اتغيرت شخصية بطلنا علشان يتجه للالتزام الديني وايه اللي تسبب في انتقاله من النقيض للنقيض؟

فريق العمل

الفيلم من تأليف وإخراج عمرو سلامه، ومن بطولة أحمد الفيشاوي وأحم مالك وماجد الكدواني وأمينة خليل وبسمه والطفل عمر أيمن

الأداء التمثيلي

في البداية لازم نشيد بالأداء التمثيلي للطفل عمر أيمن واللي قدم دور مهم ومؤثر على الرغم من قلة المشاهد اللي قام بيها، أما بالنسبة لأبطال الفيلم أحمد الفيشاوي وأحمد مالك، الاثنين قدروا يجسدوا أدوارهم بشكل أكثر من رائع، وبنعتقد أنهم في تجسيدهم للشخصيات الخاصة بيهم كانوا بيجسدوا جزء من حياتهم الشخصية. الحالة دي من (الشخصنة) في التجسيد كانت مفيدة جدا علشان يشعر كل بطل منهم بالتوحد مع دوره وده كان ظاهر على الشاشة جدا.

الأداء التمثيلي لأمينة خليل كان رائع، لكن مساحة دورها كان صغير وكنا محتاجين نشوفها لوقت أطول على الشاشة. وبشكل عام أمينة من الممثلات اللي داخلين بقوة على مستويات عالية من الأداء والقوة والصدق فيه.

السيناريو والحوار والاخراج

من الأمور المميزة في الفيلم هي أن عمرو سلامه هو المخرج والمؤلف، وده جعلنا بنشعر بوحده بين أدوات الفيلم ورموزه الموجودة بكثرة في كتير من المشاهد. أما حوار الفيلم فكان قوي ومعبر عن سيناريو الأحداث اللي حسينا أنها ماشيه في ترتيبها الصحيح بدون اسراع فيها أو بدون بطء من اللي ممكن يضايق المشاهدين. وفي النهاية برافو عمرو سلامه على فيلمه المميز.

الديكورات والموسيقى والأزياء

ديكورات الفيلم كانت جيدة، وقدرت تكون مع الإضاءة مشاهد قوية ومتميزة حملت كلها توقيع عمرو سلامه المميز واللي بنلاحظه في أفلامه.  أما الموسيقى التصويرية واللي توقعنا أننا نسمع من خلالها مجموعة من أحلى أغاني مايكل جاكسون لكن للأسف اللي سمعناه في الأخر كان اما بعض المقطوعات المقلدة أو موسيقى كانت في رأينا ضعيفة وغير مؤثرة.

وأخيرا فالأزياء الخاصة بالفيلم كانت مميزة واستوحت ملابس مايكل جاكسون في كتير من خطوطها وجنونها واللي فكرتنا بمراهقتنا اللي كانت رغم كل مشاكلها وقلة التكنولوجيا فيها كانت جميلة ومميزة وليها طعم خاص حسيناه مع (شيخ جاكسون).

الخلاصة

بنتمني كل التوفيق لفيلم شيخ جاكسون في مسابقة الأوسكار، وبننصح بمشاهدة الفيلم لكل محبي مايكل جاكسون، خصوصا اللي حضروه في فترة مراهقتهم.

علشان تبقى عارف:

الفيلم يعتبر التعاون الثاني بين عمرو سلامة وأحمد الفيشاوي بعد فيلم (زي النهاردة).