صيف ساخن جدا؟ ٥ أفلام هاتخليك تعيش… تحت الصفر
يا كل محبي الشتاء… يا اللي بتعيشوا في الفترة الساخنة اللي احنا فيها أيام صعبة.. يا كل كارهي الرطوبة، أعداء الشمس، يا كل واحد وواحده استخبوا من درجة الحرارة المرعبة… جمعنا لكم في كايرو ٣٦٠ خمس أفلام، هاتفكركم بليالي الشتاء الجميلة. وتخفض حرارة الجو عندكم لتحت الصفر.. حضروا البطانيات وتابعونا!
The Ice Road
معروف أن حياة سواقين الشاحنات العملاقة، حياة كلها خطر ومجازفة. فيه فيلم كامل هانحكي لكم عنه قريب هو (أبو صدام) عن الموضوع ده. لكن التحدي اللي واجه ليام نيسون بطل The Ice Road مكانش يتعلق بقيادة الشاحنه بتاعته بس. لكن كانت النجاه من طريق ثلجي مُرعب، لازم يمر عليه بمنتهى الحذر والدقة، وإلا مش هايوصل لعمال محتجزين في منجم ماس في كندا.
مع The Ice Road مش هاتحبس أنفاسك علشان المشاهد المخيفة، أو السيناريو اللي مش سايب لحظة واحدة للملل، لكن كمان علشان درجة الحرارة اللي تحت الصفر اللي ظاهرة في كل مشهد من مشاهد الفيلم.
The Revenant
محبي السينما عارفين The Revenant كويس.. الفيلم اللي حصل ليوناردو ديكابريو على جائزة الأوسكار بسببه. لكن محبي الشتاء عارفين الفيلم لسبب تاني خالص… الفيلم أتصور في درجة حرارة تصل الى ٢٥ درجة تحت الصفر!
The Revenant بيتتبع القصة الحقيقية لصائد الفراء الأمريكي هيو جلاس، اللي بيتعرض لهجوم شبه قاتل من دب متوحش، وبيتركه الناس لمواجهة مصيرة في البرد. لكنه بيقاوم وبيوصل للنجاة بطريقة شبه مستحيلة. تقدروا تقروا مراجعتنا عن الفيلم من هنا
Everest
بيقولوا الجواب بيبان من عنوانه… لما يبقى عنوان الفيلم (ايفرست).. متوقعين المحتوى يكون عن ايه؟ بالظبط كده.. محاولة تسلق أعلى قمة جبال في العالم، سنة ٩٦، في وسط ظروف مناخية أقل ما يقال عنها أنها قارسة البرودة.
Everest بيستعرض معانا نظرة بسيطة عن الطبيعة لما تقرر تعلن عن غضبها، وتورينا الوش التاني، وازاي الانسان اللي بيعتبر نفسه المخلوق الأقوى والأذكى، ممكن يتحول في لحظة لقشة في مهب الريح – حرفيا- لو بس الطبيعة غضبت عليه.
الفيلم ضم أسماء مهمة في عالم التمثيل، بنتكلم عن جيك جيلنهال و كيرا نايتلي و جايسون كلارك وغيرهم. وممكن تشوفوا مراجعتنا للفيلم من هنا
The Hateful Eight
بعض الأفلام بتتعرف بأبطالها، وبعضها بقصتها، لكن فيلم The Hateful Eight معروف بحاجه واحده: انه فيلم من اخراج كوينتن ترانتينو… واحد من أجن وأحلى وأعقبر (جايه من عبقري) صناع السينما في العالم… تخيلوا تارنتينو لما يعمل فيلم عن عاصفة ثلجية، وكوخ معزول، ومجموعة أشخاص غريبي الأطوار… النتيجة ممكن تكون عامله ازاي؟!
هانسيبكم تعرفوا النتيجة بنفسكم، وممكن تقروا مقالنا النقدي عن الفيلم لمعلومات أكتر بدون حرق أحداث
The Day After Tomorrow
أهمية فيلم The Day After Tomorrow مش أنه فيلم عن عاصفة جليدية بتضرب نيويورك، وتحولها من مدينة مأهولة بالسكان لصحراء بيضاء درجة الحرارة فيها أقل من الصفر..
الأهمية الحقيقية لفيلم The Day After Tomorrow أنه كان صرخة مبكرة – الفيلم من انتاج ٢٠٠٤- عن ظاهرة الاحتباس الحراري، الظاهرة اللي تعتبر السبب الأساسي في ارتفاع درجات الحرارة لدرجات غير مسبوقة. واللي بنعاني احنا منها النهرده، واللي قال الفيلم أنها هاتحصل، لو فضل الانسان مستهتر في علاقته بالطبيعة، وضارب عرض الحائط بكل ما له علاقة بالحفاظ على كوكب الأرض.
اتفرجوا على الأفلام اللي اقترحناها لكم.. وقولوا لنا.. لسه حاسين بنفس درجة الحرارة العالية؟