على وضعك: ما حدش عاجبه حاله!
مع مشاهدتنا لأحداث فيلم (على وضعك) افتكرنا جملة قالها الفنان أحمد مكي في أحد أغانيه (ماحدش عاجبه حاله حالة غيره اللي بتحلا له). الجملة العابرة دي بتلخص حال 99% من الناس، مش بس في المنطقة العربية، لكن على مستوى العالم كله. وهى دي الحبكة الأساسية اللي بتدور حولها قصة فيلم على وضعك.
فريق عمل على وضعك
الفيلم من بطولة مصطفى أبو سريع، ومصطفى نجم جديد بدأ اسمه يظهر بقوة في عدد من الأفلام والمسلسلات مؤخرا، ومن بينها مسلسل الأب الروحي، ولو فاكرين كويس، مصطفى كان صاحب واحد من أكتر الايفيهات المضحكة في الإعلانات مؤخرا، لما أدى شخصية لاعب الشيش في أحد إعلانات الأغذية الجاهزة، وكان بيغني بطريقة كوميدية اغنية (الليلة ليلة هنا وسرور)!
بيشارك مصطفى البطولة المطرب أحمد سعد، وأحمد من الفنانين اللي واجهوا صعوبات كبيرة في الفترة الأخيرة، لكن من الواضح إنه قرر العودة بقوة ومنافسة. أما تأليف الفيلم فكان من نصيب سيد السبكي، والإخراج لسارة وفيق.
قصة (على وضعك)
الفيلم بيحكي عن شخصيتين مختلفتين تماما عن بعض. أيمن بيعيش حياة كلها مغامرات نسائية، وبيساعده على كده عمله كمدير مكتب كاستنج، وبيلعب دوره أحمد سعد، أما مصطفى أبو سريع اللي بيشتغل في أحد شركات المحمول، بيعيش حياة مملة ورتيبة جدا، لكن بتحصل تجربة علمية من لطفي لبيب، بتؤدي لانتحال كل واحد شخصية الأخر، وتجربة الحياة من منظوره!
الإخراج والسيناريو والحوار
على الرغم من سهولة القصة وبساطتها، لكن الإخراج كان ضعيف وغير مترابط، كمان سيناريو الفيلم كان بيحاول يضع أكبر كمية من الرقصات والاغاني والاستعراضات على حساب ترابط القصة نفسها. الحوار أيضا كان فيه كمية ايفيهات ضخمة، والمواقف الكوميدية كانت على النقيض قليلة وتوزيعها غير جيد.
الموسيقى والديكور
مانقدرش ننكر تميز الفيلم على مستوى الموسيقى والاغاني، وكمان الديكورات كانت بتعبر عن الشخصيات وطريقة حياتها بشكل جيد، خاصة ديكورات المشاهد الداخلية واستعمال الإضاءة فيها.
الخلاصة
على وضعك فيلم قوي على مستوى الفكرة، لكنه ضعيف اخرجيا، واعتمد على كوميديا الايفيه اكتر من اعتماده على كوميديا الموقف.
علشان تبقى عارف: الفيلم بيحتوي على اكتر من أغنية من أداء الفنان أحمد سعد، المطرب الشهير وبطل الفيلم في نفس الوقت.
