عمر : خيانة الصديق.. وخيانة الوطن
المخرج هاني ابو اسعد عودنا فى افلامه على قدرته فى الغوص فى الواقع الفلسطيني حتي النخاع، وانه بيقدم لنا الحقيقه ولا شىء غير الحقيقة، بعيدا عن الشعارات بتاعة وطننا القدس وسنحرر الاقصى.. وباقى الكلام ده.
الفيلم اللى من بطولة ادم بكري و ليم لوباني، وليد زعيتر و اياد حوراني بيحكي عن قصة (عمر) الشاب الفلسطيني اللى بتنقسم حياته بين العمل فى الجانب الاسرائيلي كخباز، وبالليل بينضم للمقاومة الفلسطينية ضد الكيان الصهيوني، وبينجح فى احد العمليات انه يستهدف جندي اسرائيلي ويقتله بمعاونة اصدقاءه.
الدنيا بتتقلب وبتبدأ المخابرات الاسرائيليه تتحرك لممعرفة قاتل الجندي. بيتم الضغط على عمر وامهاله شهر واحد للتعاون مع الاسرائيليين وكشف اسم القاتل. لكن الاحداث بتتغير لما بيتعرض (عمر) للوصم من الجميع بسبب شبهة تعاونه مع الكيان الصهيوني… ثم بتستمر الاحداث.
هاني ابو اسعد المخرج قدر يثبت نفسه من فتره طويله من خلال عدد من الافلام الناجحه واللى حصل كتير منها على جوائز دولية هامه.. ابو اسعد اصبح عنده لغه سينمائية خاصة ورموز واسلوب اخراجي بيتميز من خلاله بحيث نقدر نعرف اننا بنتفرج على هاني ابو اسعد حتي لو ماشوفناش التترات!
عمر او ادم بكري قدر يقدم دور متميز.. ملامحه دائما كانت بتنطق بالغضب المكتوم والرغبة المُلحة فى الفرار من كل شىء.. حتي من نفسه او حتي من حبيبته (ليم لوباني) واللى قدرت تقوم بدور متميز هى كمان. وان كانت انفعالاتها خانتها فى بعض المواقف والمشاهد.
تقريبا الفيلم بلا موسيقي تصويرية اللهم الا بعض الاغاني او الموسيقي اللى بيتم تشغيلها فى خلفيه الاحداث. لكن الديكورات كانت متميزه وحميمية. وتنفيذ مشاهد المطاردات فى الشوارع كان واقعي وحماسى ونقل لنا جزء من اللى بيحصل فى الواقع الفلسطيني.
ناهية الفيلم ضايقت بعض المشاهدين –واحنا منهم- وكنا محتاجين بعض التفسير بخصوصها. مع العلم انها تركت كثير من الاحبال مفتوحه وغير مغلقة.
عمر فيلم فلسطيني قوي ومحترم. وهاني ابو اسعد مخرج وكاتب عظيم.. بننتظر جديده على احر من الجمر دائما.
