عيش حياتك: خليك فريش إحنا في رحلة!
“عيش حياتك” بيحكي عن إبراهيم (سامح حسين) اللي حياته كلها ملل وتكرار نتيجة خوفة من تجربة أي حاجه جديدة في الحياة. لكن كل ده بيتغير لما بيضطر يسافر تبع الشغل مع زميلته داليا (ساندي) علشان يصوروا حملة إعلانية جديدة.
سامح حسين بيحاول يخرج من الاطار الفني اللي حبس نفسه فيه لفترة طويلة في دور الشاب منخفض الذكاء محدود الفهم. وفي رأينا أن سامح له قدرات فنية كبيرة وتستحق التوظيف بشكل جيد ومميز.
عيش حياتك هو التجربة السينمائية الثانية لساندي بعد فيلمها الخفيف (خلطة جيمي). ساندي عارفه – واحنا كمان- أنها مش هاتكون أفضل ممثلة في السينما المصرية. علشان كده بتحاول تعوض عدم تمكنها التمثيلي بخفة الدم وقدراتها الغنائية. وبشكل عام الجمهور بيتصالح مع المطرب لما يمثل علشان عارفين أنها مش وظيفته الأساسية.
المخرج تامر بسيوني قدم لنا تجربة بصرية جيدة من خلال التصوير في أماكن سياحية جميلة في مصر. ودعم السياحة بشكل عام كان من الأهداف المعلنة للفيلم. والحقيقة أن ناس كتير من اللي هاتشوف الفيلم هاتتفتح عينها على أماكن خلابة في مصر تستحق الزيارة.
عيش حياتك فيلم عربي خفيف وظريف وننصح بمشاهدته للناس اللي مش عاوزه ترهق ذهنها في أفلام معقدة.