قط وفار : فانتازيا المواطن والدولة

الصراحة احنا بنحب الافلام اللى بتتناول العلاقة بين المواطن والدولة، فى اطار الفنتازيا والكوميديا اللى بتنتج عنها، ويمكن من افضل الـSegments اللى عجبتنا فى مسلسل (صاحب السعادة) بطولة عادل امام واللى تم عرضه فى رمضان الماضى، هو التعرض لشخصية وزير الداخلية.

من تأليف وحيد حامد واخراج تامر محسن، بنشوف قصة مواطن غلبان (محمد فراج) واللى بتتوفى والدته (سوسن بدر) اثناء التجهيز لحفل خطوبة بنت وزير الداخلية، ولأن الوفاة بتحصل داخل فيلا الوزير، ولأن علاقة قرابه بتجمع بين عائلة (القط) حيث ينتمي وزير الداخلية (محمود حميده) وعائلة (الفار) حيث ينتمي (محمد فراج)، بتحصل العديد من المفارقات الكوميدية المدهشة والمتداخلة مع بعضها، واللى بتعرفنا امور كتير عن الدولة وكواليسها.

المحيطين بالوزير بيحاولوا يقنعوه يتصدر العزاء ويلغي خطوبة بنته، لكن زوجته المتسلطة (ميرفت) واللى قامت بدورها سوزان نجم الدين، بتحاول تفرض وجهه نظرها، وفى وسط كل ده بيظهر الابن الضعيف (حماده الفار) مطالبا بجثه والدته فى ظل ضغط اهل الحارة اللى عايش وسطها عليه.

الفيلم بيختار فترة الرئيس المعزول مبارك للتعرض للاحداث، وبنفهم ده من الصور المعلقة على الحائط فى خلفيات المشاهد اللى بيظهر فيها وزير الداخلية، ومن الامور الجريئة اللى لاحظناها فى الاحداث هى تسمية  الاماكن والامور باسمها الحقيقي، على سبيل المثال (محمد فراج) بيشتغل فى جريدة (الاهرام) واللى بيظهر مديرها بصورة المسئول الحكومي اللى بيسعي لارضاء رؤساؤه بأى شكل ممكن، وبيخاف طوال الوقت من الجواسيسي اللى بينقلوا المعلومات للجهات الأمنية.

ايضا بيظهر التعاون بين رؤساء تحرير الجرائد المعارضة وبين الحكومة – طبعا من تحت لتحت – من خلال المشهد اللى جمع بين الفنان عماد رشاد فى دور رئيس تحرير احد الجرائد المعارضة، وازاى بيعطي لوزير الداخلية نصائح لتجميل صورته امام الشعب.

من الامور اللى بناخدها على السيناريو، طريقه التعرض لاهل الحارة، فى  بداية احداث الفيلم بنشوفهم كمجموعة من الطمعانين فى بنت الحته المثيرة (سوسن بدر)، لكن بعد وفاتها بيقفوا كلهم بجوار ابن المنطقة (محمد فراج) وبيساعدوه يوصل لجثتها، احنا فاهمين طبعا الاسقاط السياسى والمجتمعي فى الاحداث، لكن كنا محتاجين بعض التبرير على صعيد الاحداث العادية.

محمود حميده فى اداء نمطي لشخصيه وزير الداخلية، قدر يدهشنا فى بعض المشاهد، لكن بعض المشاهد الاخرى اداها بشكل نمطي، سوزان نجم الدين فى دور الزوجة المتسلطة ميرفت قدمت دورها بشكل مبالغ فيه، وان كانت المشاهد الافتتاحية لها اثناء تجهيز الفيلا متميزة. محمد فراج بيحاول يجرب نفسه فى نوعيات مختلفة من الاداء التمثيلى، ونعتقد ان دوره فى الفيلم كان جيد بالنسبه لامكانياته الفنية.

الموسيقي التصويرية كان لها دور مهم فى الاحداث، وكانت متميزة وجميلة، والديكورات ايضا كانت رائعة ومهتمه بالتفاصيل، خصوصا ديكورات فيلا الوزير اللى امتازت بالفخامة والاهتمام بشكل الديكورات خصوصا مع الكادرات  الواسعة للتصوير.

قط وفار فيلم كوميدي سياسى اجتماعي عن الاحداث اللى بنقابلها فى مصر بشكل يومي، ننصحكم بمشاهدته وتصنيفه وفقا للمساحة اللى بيناقشها.. مش اكتر ولا اقل.