قواعد الفرجة على أفلام الرعب فى مصر
الموضوع ده إهداء بشكل عام لمحبى الفرجة على أفلام الرعب فى السينمات فى مصر، لكنه إهداء بشكل خاص لمجموعة من المشاهدين حابين نتكلم عنهم بتفصيل أكتر… الموضوع ده إهداء للناس اللى بيحصل لها إختفاء قسري فى الإستراحه ومش بنشوفهم تاني فى قاعة العرض.. تقريباً بيهربوا من تكملة فيلم الرعب وأعصابهم مش بتستحمل.. والفيلم ده إهداء للبنت اللى كانت قاعده جنب محرر كايرو360 واللى اللى أعطت ضهرها للشاشة وقعدت على ركبها على الأرض ودفنت وشها فى الكرسى علشان ما تشوفش الأحداث ! الموضوع ده إهداء للناس اللى بيتحول عندها مشاهدة فيلم الرعب من تسليه لعذاب حقيقي.. هنقول لكم إزاي تستمتعوا بلذة الرعب.. وتنسوا أعراضه الجانبيه.
1 بلاش تاخدوا أطفال الفيلم!
حباً فى الله والوطن وفى زملائكم من المشاهدين… نناشدكم بأسمي معاني الرحمه إنكم ما تاخدوش أطفال معاكم فى أفلام الرعب، علشان هايقضوا الحفله كلها عياط وهايبوظوا علينا الفيلم، بالإضافه إلى أنهم ممكن يبوظوا مرتبة السرير بالليل لما تهاجمهم كوابيس الأفلام اللى دخلوها معاكم.. بعض الأطفال لازم يتم إستثناءها من القاعدة دي، ومنهم الطفل اللى راقبه محرر كايرو360 بيضحك بشغف أثناء فيلم The Cabin in the Woods واللى جعل محررنا خايف من الطفل أكتر من خوفه من الفيلم!
2 إمنعوا الفيشار!
لو مش حامل وبتتوحمي علي الفيشار وخايفه البيبي يطلع له (فيشاره) فى وشه… لو معندكيش الحالة دي يبقى من المستحسن حضرتك بلاش تاخدي فيشار معاكي أثناء مشاهدة فيلم رعب… علشان مع كل مشهد مرعب فى الفيلم حضرتك هاتمارسى هوايتك المفضلة فى النط على الكرسى، والفيشار هايغرق الناس اللى قدامك ووراكي.. كمان يستحسن تربطي نفسك فى الكرسى علشان ساعات النطه اللى بتعمليها بتكون مرعبه أكتر من المشهد نفسه!
3 إثبت مكانك!
لو مافيش حالة طارئة جداً تستدعي إنك تقوم من مكانك وتغادر القاعه… لو مافيش حريقه فى البيت أو أسهمك فى البورصة ما نزلتش بنسبة 90%… لو سمحت بلاش تقوم من مكانك أثناء مشاهدة فيلم رعب، علشان أكتر حاجه مرعبه لواحد أعصابه كلها مشدوده مع الأحداث هى إنك تحتك بيه وإنت قايم من مكانك.. حالات الهلع اللى شوفناها نتيجة المواقف دي كانت مرعبه أكتر من فيلم الرعب نفسه، ومحرجه لأبطالها جداً.
4 الحبيبه يمتنعون!
زي ما اتكمنا عن الأطفال نحب نتكلم عن الناس المقبله على حياه عاطفيه سعيده، وفاكرين إن تجربة مشاهدة فيلم رعب مع بعض ممكن تزود من قُربهم من بعض فى العلاقه… أبسليوتلي… كل اللى هايحصل إنكم ممكن تشوفوا ردود أفعال ما كنتوش تتوقعوها من بعض… زي إن حبيبتك تشوفك وإنت بتصرخ بشكل لا إرادي مثلا، أو إنك تبقى قاعد فى أمان الله تلاقى إيد حبيبتك نزلت على وشك بالتزامن مع مشهد رعب… مانعتقدش إن الحركه الأخيره دي ممكن تبقى لا إرديه هى كمان… شوف بس إنت زعلتها فى إيه قبل الفيلم!
5 بلاش تعيش الفيلم
أخر نصايحنا ليكم.. بلاش تعيشوا جو الأحداث بعد ما يخلص الفيلم.. بلاش تخلوا اللى شوفتوه فى الفيلم يأثر على سلوككم فى الشغل أو البيت.. وبلاش تفكروا كتير فى احداث أفلام الرعب اللى شوفتوها علشان ده ممكن يأثر على قدرتكم على التخيل، ويخليكم تشوفوا أو تسمعوا حاجات مش بتحصل.. إفتكروا دايما إنكم بتتفرجوا على فيلم عادي زي أي فيلم تاني، وافتكروا إن الـ…. معلش إحنا مضطرين نقفل المقال على كده علشان سامعين صوت فى الـ Meetings Room رغم إن مافيش حد هناك!
