كذبة كل يوم : تراجيديا كوميدية متناغمه!
على الرغم من انها فكرة قوية ومؤثرة وبتعجب كتير من الجمهور، إلا أن السينما المصرية مقلة فى تقديم أعمال سينمائية بتتكلم عن الأزواج وطبيعة العلاقة بينهم.. ممكن نفتكر بعض الأفلام زي (سهر الليالى) أو (سكر مر) أو حتي فيلم زي (أحاسيس).. لكن بشكل عام بتظل المنطقة دي عامله زي منجم الذهب الغير مُكتشف من صناع وكتاب السينما.
فى المنجم ده غطس شريف الألفي وهشام منصور كمؤلفين.. وخالد الحلفاوي المخرج، وقرروا يقدموا لنا فيلم كوميدي فى بدايته.. جاد فى منتصفه ونهايته، عن العلاقة بين الأزواج، من خلال إستعراض قصة 2 شباب متزوجين (عمرو يوسف و محمد ممدوح) بيجمعهم القدر مع شاب مقبل على الزواج (كريم قاسم) قبل يوم واحد من الخطوبة، فى نفس الوقت اللى بيجمع القدر زوجاتهم (دينا الشربيني) و (درة) مع ست مختلفة جدا هى الجميلة دائما وأبداً (شيرين رضا)… ومن هنا بتبدأ الأحداث فى التلاحم ويبدأ الفيلم يسخن جدا…
الخلطة الكوميدية التراجيدية فى الفيلم كانت محسوبة جدا وموزونه جدا وقادرة تجمع بين تقديم فيلم كوميدي (مش تافه) وفى نفس الوقت تقدم فيلم جاد (مش نكد).. والفرق بين الكوميديا والتفاهه شعره.. وبين الجديه والنكد شعره تانيه.
الأداء التمثيلي لعمرو يوسف كان جيد.. عمرو قادر يقدم أدوار جديدة ومختلفة ومتنوعة كل فترة.. بيعيد إكتشاف نفسه مع كل عمل بيؤديه، وبيهتم بكل فيلم أو مسلسل بيشترك فيه كأنه أخر وأفضل عمل بيقوم بيه.. عمرو كمان قادر يحافظ على وزنه ومظهره وده طبعا كان له مفعول السحر على الجنس اللطيف اللى كان حاضر معانا الحفله، درة كان أدائها اضعف شوية عن عمرو، وكان ظهورها أمام شيرين رضا إختبار قوي لها للأسف لم تنجح فيه، على العكس من دينا الشربيني اللى رغم ظروفها الشخصية قدرت تثبت نفسها وتقدم دور قوي…
لازم نتكلم شويه عن بيومي فؤاد و فاروق الفيشاوي، واللى على الرغم من مساحة دورهم الصغيرة وظهورهم المتأخر على الشاشة، قدروا يعملوا جو من الكوميديا المتميزة واللى كان لها دور كبير جداً فى نجاح الفيلم، ويمكن ده باين بقوة من التريلر بتاع الفيلم.
كذبة كل يوم .. فيلم كوميدي متميز ومتعوب عليه تأليفاً وإخراجاً وتمثيلاً.
