لو في الأفلام حريف.. أفلام لازم تشوفها كل خريف
“يوجد ألف سبب يدعوني لكراهية الربيع.. آخرها أنه ينذر بمرض شاعري الاسم لا نجده في فصل آخر: الرمد الربيعي. لهذا أحب الخريف.. ولو تغاضينا عن حقيقة أنه لا يوجد رمد خريفي؛ يمكننا القول بأنه الفصل الوحيد الذي له مذاق الحزن المرهف.. والرقة الشفافة.. ذلك المذاق الذي لا نجده في فصل آخر”
كلمات بسيطة – لكن عميقة- وصف بيها أستاذنا أحمد خالد توفيق فصل الخريف.. الفصل اللي بيجمع بين رومانسية وهدوء الشتاء، مع بعض الصخب من الصيف، وبالتأكيد، كتير من التقلبات الجوية والكهرباء الاستاتيكية اللي بتلمس أرواحنا قبل أجسادنا.
ولأن الأفلام هي أفضل صديق في الأجواء دي. تعالوا نشوف مع بعض مجموعة من أحلى الأفلام اللي ممكن تتفرجوا عليها في الخريف:
You’ve Got Mail
بنعتبر You’ve Got Mail صديق العشاق الأول، مش بس علشان الأجواء الخريفية اللي بيدور فيها، لكن كمان علشان القصة بتحكي عن حالة حب بيعيشها اتنين متخانقين على أرض الواقع، لكن على الانترنت بيجمعهم الشات وتبادل الايميلات. لحد ما بيقرروا يتقابلوا في الحقيقة وتحصل المفاجأة.
مش محتاجين نتكلم عن تمثيل العبقري من توم هانكس، والجميلة ميج ريان، اللي كنا بنتخيلها كل مرة ندخل فيها اونلاين نعمل شات مع حد ما نعرفوش.
Autumn
الخريف مش دايما بيعبر عن الرمانسية والخيال.. ممكن كمان يكون مرادف للرعب. فيلم Autumn اللي تم انتاجه سنة ٢٠٠٩ بيحكي عن فيروس غريب بيقتل ملايين البشر في ثواني. وبيكون أمام الناجين تحدي أنهم يجمعوا شتات نفسهم ويعيدوا توحيد صفوفهم، خاصة أن الأمور بتتجه أنها تكون أسوأ بكتير.
Sweet November
نرجع تاني للرومانسية. فيلم Sweet November عن راجل مدمن لشغله، بتضطره الأحداث أنه يقيم مع واحده على النقيض من أفكاره وأفعاله تماما لمدة شهر نوفمبر كاملا… الإقامة اللي هاتغير حياتهم تماما.
فيلم Sweet November لطيف جدا وبنشوف فيه تعاون بين اتنين من أباطرة هوليود. كيانو ريفز وتشارلز ثيرون. في أدوار بعيدة عن أدوار الأكشن والصراعات اللي قدموها قبل أو بعد Sweet November
Election
مع احترامي، للناس وللأسامي، بس فصل الخريف مش بس للرومانسية أو الرعب. احنا ليه ناسيين أن فصل الخريف يشتهر ببداية الدراسة؟! ولكل طالب عاوز يتفرج على فيلم له علاقة بعالم المدارس والجامعات. نهديه فيلم Election المنتج سنة ١٩٩٩ بطولة ماثيو بروديريك و ريس ويذرسبون واللي بنشوف فيه العالم الخفي للانتخابات الدراسية، وايه اللي ممكن يحصل فيه في اطار كوميدي قادر يخطفنا من اول مشهد لأخر مشهد.
Parasite
ولأن الأحلى دايما بنخليه للأخر.. فيلم Parasite مش بس فيلم خريفي جميل. ده الفيلم الفائز بأوسكار أحسن فيلم سنة ٢٠٢٠ كأفضل فيلم أجنبي. يعني هانشوف مباراة تمثيلية غير تقليدية. لكن الأحسن من التمثيل هنا، هو القصة نفسها. اللي بتحكي عن أسرة تحت خط الفقر، بتقدر – بطريقة معينة مش عاوزين نحرقها عليكم- أنهم يحلوا محل أسرة غنية جدا. ومن هنا بتبدأ الأحداث في التعقد.
