ماتضيعش العيدية.. دليلك لاختيار فيلم العيد المناسب
موسم عيد الفطر يعتبر واحد من أكتر مواسم الأفلام اللي بيستناها عشاق السينما، علشان يتفرجوا على أفلام تناسب ذوقهم. ولأننا عارفين أن العيدية دايما قليلة، والأفلام دايما كتير.. حبينا نعمل لكم دليل يساعدكم في فهم خريطة أفلام موسم عيد الفطر ٢٠٢٢.
لو بتحب مسرح مصر.. شوف (زومبي) بدون تفكير
فريق (مسرح مصر) المسرحي اللي اكتشفه وقدمه الفنان أشرف عبد الباقي، قدر يكون جمهور كبير على مدار السنوات الماضية. بالتالي لو كنت من محبي الكوميديا اللي بيقدمها علي ربيع وحمدي الميرغني و (ويزو) يبقى لازم تشوف (زومبي) اللي بتدور احداثه عن مطرب شعبي بيمر بمواقف كوميدية نتيجة مطاردة الزومبي لهم.
مش بس جمهور مسرح مصر اللي هايحب (زومبي) .. لو بتحبوا أغاني المهرجانات ومقاطع التيك توك الغنائية هاتحسوا ان الفيلم يستحق المشاهدة في موسم عيد الفطر ٢٠٢٢
جمهور (زومبي) هايكون من الأسر اللي شافت عروض مسرح مصر قبل كده، وممكن يعجب الأطفال اللي عاوزه تشوف مشاهد مطاردات كوميدية.
أشباح أوروبا.. مايتفوتش من محبي الأكشن
الشباب اللي سنهم صغير شوية، وعاوزين يتفرجوا على أكشن من اللي مش محتاج تبذل مجهود ذهني كبير علشان تفهم أحداثه. مع جُمل حوارية رنانة من اللي بيستعملوها بعد كده في فيديوهات تيك توك أو حتى في قعدات الصحاب لما بيبقوا عاوزين (يعلوا على بعض).. جُمل زي “أنا الغلطة معايا بموته”… كل ده مع محبين جمال هيفاء وهبي وأروى جودة.. كاريزما عباس أبو الحسن و قفشات أحمد الفيشاوي. كل ده مضروب في الخلاط وهايتم تقديمه في فيلم (أشباح أوروبا).. ماتفوتوش الفيلم ده لو بتحبوا الأجواء دي. وفي نفس الوقت لو الخروجة للسينما للأسرة كلها أشباح أوروبا مش هايكون اختيارهم الأول.
العنكبوت.. أكشن لكبار السن!
الجيل الأكبر شويه من الشباب اللي هاتحب (أشباح أوروبا).. الجيل اللي اتربى على ثنائيات سينمائية زي أحمد السقا ومنى زكي وحبهم في أفلام زي (تيمور وشفيقة). المفروض هايحب (العنكبوت) اللي بيدور في أجواء أكشن عن تاجر مخدرات بيتعرض لمشاكل كبيرة وبيهرب من مطاردة البوليس.
ماعندناش معلومات كتير مؤكدة عن (العنكبوت)، لكن نتوقع أنه يعجب محبي السقا عموما، وهايجذب الجمهور اللي عاوز أكشن (مضمون) وفيه تشغيل دماغ خاصه أن الفيلم من اخراج أحمد نادر جلال اللي قدم لنا مسلسل العائدون ومسلسلات كتير مع الفنان يوسف الشريف زي كفر دلهاب وفيلم بني أدم.
فارس
مافيش معلومات كتير متوافره عن فيلم فارس، لكن من اللي وصل لنا عن الفيلم، من الواضح أن جمهوره هايكون نفس الجمهور اللي بيحب قصص الكفاح والصعود من الصفر، نفس الجمهور اللي بيحب أفلام محمد رمضان أو حماده هلال لما عمل دور ملاكم في (حلم العمر) لكن المره دي هانشوف أحمد زاهر في البطولة. وواضح أنه قرر يجرب حظه في النوعية دي من الأعمال بعد نجاح مسلسله مع محمد رمضان في مسلسل البرنس.
لو انت واحد تاني.. شوف “واحد تاني”!
وأخيرا.. لو شايف انك شخص تاني غير اللي اتكلمنا عنه في الأفلام اللي فاتت دي كلها، فيلم (واحد تاني) لأحمد حلمي هايكون هو المكان المناسب علشان تقطع تذكرتك وتتفرج على الفيلم.
واحد تاني هايكون مناسب للمشاهدين اللي عاوزين تسلية مضمونة في العيد، منغير تفكير كتير، ومنغير خوف من ألفاظ أو مشاهد مش مناسبة للأسرة كلها. كل ده مع شوية كوميديا كويسه. لكن نتوقع مايكونش فيه مساحة كبيرة للأكشن في الفيلم.
جمهور “واحد تاني” هايكون غالبا من الأسر اللي عاوزه انبساط مضمون في العيد. أو الـ couples سواء مخطوبين أو متجوزين. ومش هايكون مناسب لشلل الشباب اللي عاوزين أغاني ورقص وأكشن من أول لقطة لأخر لقطة.
