مسلسل Hijack : تعالوا نفكر جوه الصندوق!
تقريباً مافيش حد بيتفرج على أفلام أو مسلسلات أجنبية، غير وصادف قصة احتجاز رهائن، وكيفية التعامل مع المواقف الإنسانية والأمنية المعقدة اللي بتنتج عن احتجاز الناس والمطالبة بطلبات للإفراج عنهم. حتى أننا في أعمالنا العربية ناقشنا أفكار مماثلة في أعمال زي (طلق صناعي) و (الإرهاب والكباب) وغيرها.
مسلسل Hijack قرر أنه يضرب فكرتين من (جوه الصندوق) في الخلاط: تيمة احتجاز الرهائن وتيمة اختطاف الطائرة.
بداية المسلسل كانت قبل اقلاع طيارة كانت في طريقها من دبي لندن، وفيها ناس كتير مختلفة الجنسيات والأعراق. ومن هنا بنتعرف على بطلنا، سام نيلسون، (قام بالدور إدريس ألبا). سام كان مفاوض تجاري وجاي لندن عشان ينقذ زواجه الغير مستقر.
بعد أقل من ساعة من إقلاع الطيارة، بيخطف خمس مسلحين الطائرة باللي عليها من ركاب. في اللحظة دي، كان لازم لسام يستخدم كل حيله وقدراته عشان يأثر على الخاطفين، ويبلغ السلطات في نفس الوقت أن الطيارة اتخطفت.
المسلسل من 7 حلقات، كل حلقة فيها حوالي 40 دقيقة، وبيعرض حصريا على منصة Apple TV+، وكان فيه اهتمام بالزمن الحقيقي، مش زي المسلسلات التانية اللي بتختصر الزمن عشان تغطي أحداث أكتر. دايمًا المشاهد بيحس بأن الوقت طويل واللحظات بتكون مهمة جدًا في حياة الشخصيات. الثواني والدقائق بتكون لحظات حاسمة في حياتهم، وبتزيد من التشويق والإثارة. وده يعرفنا أهمية كتابة سيناريو مسلسل بالمستوى ده من التعقيد.
كل حلقة بتخلص بمفاجأة تغير الوضع، بس بشكل مش متوقع تمامًا وفي نفس الوقت بتخلي الناس متحمسة للحلقة اللي بعدها.
المسلسل بيتميز بالمنطق والكتابة الذكية، واستخدام الزمن بشكل حقيقي. بيختلف عن الأبطال اللي بنشوفهم في المسلسلات والأفلام الأمريكية اللي بيضحوا بحياتهم عشان ينقذوا الناس. سام كان شخص طبيعي وبيفكر زي أي حد هيقع في نفس الورطة، وكان لازم يستخدم حيلته وأنانيته بعض الأحيان. دايمًا كان بيحاول يحمي أسرته حتى لو اضطر للدخول في صفقات مشبوهة، تخلي سمعته سيئة بين باقي الركاب.
اللي زود التشويق في المسلسل هو الخداع اللي بيحصل للركاب والسلطات، وكل واحد فيهم مش عارف حقيقة الثاني. بينما احنا كمشاهدين عارفين الحقيقة كاملة، وده تكنيك كتابة صايع جدا بيخلي المشاهد حاسس أنه يملك اليد العليا على الأحداث، ومتشوق للمتابعة لحد أخر لحظة.
لكن من ناحية تانيه التكنيك ده في السيناريو، خلانا نحس أحيانا ببعض التطويل، زي الوقت الطويل اللي استغرقته السلطات علشان تعرف أن فيه اختطاف على الطيارة، وزي الوقت الأطول اللي بيعرف فيه بتوع الأمن أن فيه مشكلة في أحد المنازل اللي بتسكن فيها واحدة من العاملات في المطار، كل ده أكل من زمن المسلسل اللي المفترض أنه قصير أصلا.
من ناحية تانيه عجبنا اختلاف الثقافات/الأديان/اللغات داخل الطيارة، على الرغم من أننا قدرنا نطلع المشاكل في اللهجة المصرية في ثواني طبعا، لكن عجبنا فكرة تجسيد وجود عرب ومصريين على متن الطائرة، ومش بيطلعوا إرهابيين ولا سفاحين في النهاية، زي ما اتعودنا على ده من بعض الأعمال التانيه للأسف.
بنرشح Hijack للناس اللي عاوزه عمل كله تشويق واثارة، أحداث سريعة ومتعاقبة، بدون استهانة بذكاء المشاهد، مع حلول وحيل بره الصندوق، رغم أن فكرة المسلسل نفسه من جوه الصندوق!