مسلسل Ted Lasso : وما الحياة إلا ملعب كبير!

مع بداية تقديم منصة Apple Tv+ لخدماتها، كان مسلسل Ted Lasso هو الجواد الرابح اللي بتراهن عليه. حتى أن منشورات

الدعاية على السوشيال ميديا اللي قدمت لنا المنصة للمرة الأولى، كانت بتلعب على ورقة التسويق بـ Ted Lasso. لكن احنا كان عندنا رأي تاني.

كنا شايفين أن Ted Lasso مسلسل مُبالغ في الدعاية له، عن قصة تقليدية لكابتن فريق بيقود أعضاء الفريق للنجاح وتحقيق الفوز، وأن الدراما الرياضية مش أحسن حاجه نتابعها وسط طوفان أعمال نتفليكس وإنتاج هوليود الغزير. وبعد مشاهدة حلقتين من الموسم الأول من Ted Lasso عرفنا أن أنطباعنا الأولي مكانش سليم خالص. وقررنا نتابع كل حلقات المسلسل للنهاية.

Ted Lasso بطل المسلسل اللي بيحمل نفس الإسم – قام بالدور جيسون سوديكس – هو مدرب كرة قدم أمريكي، بيتم الاستعانة بيه علشان يدرب فريق بريطاني صاحب مسيرة متعسرة جداً. والفارق بين كرة القدم الأمريكية والبريطانية ضخم جدا، كما أن سمعة  تيد نفسها كمدرب محترف مش أحسن حاجه. وصاحبة النادي نفسها مش عاوزه فريق الكرة عندها يكسب، في ضمن خطتها لتدمير النادي علشان تنتقم من زوجها السابق، اللي كان شايف أن فريق كرة القدم هو أعظم إنجاز له في الحياه.

بالقصة المتشابكة دي، بنبدأ نشوف (تيد) وهو بيستكشف الوظيفة الجديدة الصعبة والمعقدة اللي المفروض يقوم بيها. أعضاء الفريق نفسهم مش حاسين أنهم مع مدرب محترف، والجمهور بينتهز كل فرصة علشان يشتمه ويسخر منه، والصحافة عاملينه تريقتهم الأولى، والسوشيال ميديا مخلياه (ترند) طول الوقت من كُتر الشتيمة فيه.

لكن رغم كل ده، (تيد) مش فاقد الأمل، وعنده قدرة غريبة على تحويل كل المواقف السلبية في حياته لإيجابية، ومن هنا بنشوف أروع جزء في المسلسل والحبكة الدرامية، لما بنكتشف أن Ted Lasso مش مجرد مسلسل رياضي عن قصة صعود فريق كرة، لكنه مسلسل عن إزاي نخلي نقط ضعفنا هي نفسها نقط قوتنا؟! وازاي القدر بيقف مع الغلابة معدومي الحيلة ويخلي الأمور كلها تسير لصالحهم، مهما تضافرت عليهم المؤامرات.

(تيد) بمجرد تولية مسئولية تدريب الفريق، بدأ يدرس طبيعة شخصية كل واحد، ويشوف نقاط قوتهم ويركز عليها، ونقاط ضعفهم ويحاول يعالجها. وتصدى لحالات التنمر على اللاعبين الأضعف، وبدأ يدرس حياتهم الأسرية، ويحفظ مواعيد أعياد ميلادهم، وفي نفس الوقت يبني أواصر صداقة وعلاقة كويسة مع الجهاز الفني ومديرة النادي، وحتى الصحفيين اللي مستنيين له غلطة، أجمعوا أنه قد يكون مدرب فاشل، لكنه أكيد إنسان راقي وله طريقته الخاصة في الوصول لأهدافه.

Ted Lasso بيعلمنا ازاي ننجح في أعمالنا، مهما كانت الظروف المحيطة بينا صعبة، وازاي نكسب حب واحترام الناس بدون ما نخسر كرامتنا أو نضطر نتملق الأخرين علشان يهتموا بينا. والطريقة اللي أدار بيها (تيد) حياته الشخصية والعملية، قابلة للتطبيق مش بس في عالم الرياضة، لكن في باقي تفاصيل حياتنا اليومية.

بنعيب على المسلسل أنه كان بخيل في مشاهد الملاعب، ومن الواضح أنه كان محتاج إخراج رياضي أفضل من اللي شوفناه بيه. لدرجة أن السيناريو كان بيتعمد القفز من على مشاهد المباريات علشان مايحطش الإخراج في أزمة تقديم مشاهد مطولة من المباريات. لكن من ناحية تانيه مفهوم رغبة المسلسل في أنه يقول بصوت عالي: إحنا مش مجرد مسلسل رياضي عن كرة القدم. إحنا عاوزين نقدم سيناريو قوي وقصة محبوكة، تنفع لضبط حياة البشر بشكل عام.

كل ده لما يمتزج بالأداء الأكثر من رائع للبطل جيسون سوديكس مع باقي فريق العمل، اللي قدر يحول السيناريو المكتوب لمشاهد رائعة، بتخلينا أحيانا نبكي ونضحك في نفس الوقت، وبتخلي بعض الحلقات زي حلقة Carol of the Bells نعتبرها واحدة من أحلى حلقات المسلسلات اللي شوفناها على الإطلاق بسبب كمية الدفا والحب اللي حسينا بيهم في الأحداث. كل دي كانت عوامل تصب في مصلحة Ted Lasso وتخليه واحد من أكتر الأعمال اللي ننصحكم بمشاهدتها، حتى لو مكانش لكم في الكورة خالص.. مع Ted Lasso هاتتعلموا أن الحياة ما هي إلا ملعب كبير!