معاوية… تفاصيل المسلسل الأكثر اثارة للجدل في رمضان ٢٠٢٥

كل سنة وحضراتكم طيبين.. مجرد ساعات بتفصلنا عن شهر رمضان الكريم لسنة ٢٠٢٥. شهر الصيام والطاعة، وشهر التجمع حوالين التليفزيون علشان نتفرج على أعمال درامية عظيمة، أصحابها بيشتغلوا عليها من السنة للسنة. وزي ما الأعياد هي موسم طرح الأفلام الجديدة، رمضان هو موسم المسلسلات.. ومش أي مسلسلات.. رمضان السنة دي هايشهد عرض واحد من أكتر المسلسلات المثيرة للجدل، وهو مسلسل معاوية.. تعالوا  نتعرف على التفاصيل

معاوية.. مثير للجدل علشان قصته

قصة المسلسل عن أحداث الفتنة الكبرى، وهي الفترة بعد استشهاد الخليفة عثمان بن عفان، مرورًا بتولي (علي بن أبي طالب) الحكم، ثم استشهاد (علي) وتولي (الحسن)، ثم تنازل (الحسن) وتولي (معاوية)، وتولي (يزيد)، وحتى استشهاد (الحسين) في كربلاء. ودي واحدة من أكتر الفترات اللي عليها جدل تاريخي واجتماعي وانساني، والأعمال اللي ناقشت الفترة دي سواء كتب تاريخية أو روائية، مش بتتوقف عن اثارة الجدل لحد وقتنا الحالي.

معاوية.. مثير للجدل علشان فريق العمل

مؤلف المسلسل هو خالد صلاح، وهو العمل الأول اللي يكتبه رئيس التحرير السابق لجريدة اليوم السابع، اللي تعتبر من أوسع وأشهر الجرائد المصرية انتشاراً.

احنا متحمسين نشوف التجربة الأولى لخالد ككاتب مش كصحفي، خاصة أن اللي هايخرج (معاويه) هو طارق العريان، وده واحد من أحسن وأكتر المخرجين المحترفين في مصر والعالم العربي، وصاحب أفلام بحجم ولاد رزق و الخلية، لكن دي تقريبا التجربة التاريخية الأولى لطارق العريان. علشان كده متحمسين نشوف الـ Mix  ده في الإخراج والكتابة هايبقى عامل ازاي.

معاوية.. مثير للجدل علشان الممثلين

بيقوم بدور معاوية بن أبي سفيان الفنان السوري لجين إسماعيل، وبيقوم بدور علي بن أبي طالب الفنان اياد نصار، وبنشوف سهير بن عمارة في دور هند بنت عتبة، و وائل شرف في دور عمرو بن العاص، وسامر المصري في دور عمر بن الخطاب، وعندنا مشاركات من فنانين بحجم سوسن بدر و عائشة بن أحمد و صبا مبارك وأسماء جلال، وده خليط من الممثلين المثيرين جدا للجدل، والمثير أكتر هو فكرة تجسيد شخصيات لها ثقل ديني وتاريخي على الشاشة، وده جدل بيتكرر مع كل عمل يقرب من المنطقة دي.

معاوية.. مثير للجدل علشان انتاجه

الكلام حاليا عن ان المسلسل تأجل ٣ سنوات لحد ما يتم عرضه أخيرا في ٢٠٢٥.. كمان فيه كلام عن ان المسلسل تكلف انتاجه ١٠٠ مليون دولار.. وده مبلغ ضخم جدا على الأعمال العربية والأجنبية كمان.. وده بيرفع سقف توقعاتنا لحدود ما وصلهاش قبل كده…

معاوية.. مثير للجدل علشان ردود الفعل

وأخيرا.. معاوية مثير للجدل علشان ردود الأفعال اللي ماليه الدنيا على السوشيال ميديا من وقتنا الحالي.. وده يخليه واحد من أكتر الأعمال اللي عليها كلام قبل حتى ما يتم عرض الحلقة الأولى منه..

واحنا من ناحيتنا قررنا نتفرج على (معاوية) ونرجع لكم برأي تفصيلي بالتزامن مع عرض المسلسل علشان نقدر نكون رأي ووجهة نظر حقيقية عن واحد من أكتر الأعمال المثيرة للجدل في رمضان ٢٠٢٥.