ممنوع الاقتراب أو التصوير: مبالغة بدون كوميديا
لما بنشوف فيلم بيصدر في وقت غير وقت مواسم الأفلام العربية زي مواسم الأعياد والأجازة الصيفية، بنحاول نشجعه قدر الإمكان علشان نقدر نوصل لموسم سينمائي مستمر على مدار العام ومش مقتصر على إجازة معينة أو فصل معين من فصول السنة. ودي كانت نيتنا نحو فيلم ممنوع الأقتراب أو التصوير، لكن للأسف المستوي الفني للفيلم لم يساعدنا اطلاقا على تشجيعه!
القصة
السيدة (ثريا) اللي بتقوم بدورها الفنانة ميرفت أمين إنسانة غنية ومنحدرة من عائلة عريقة، لكنها بتقع في مشكلة قانونية مع أحد أقسام الشرطة، واللي بيتواجد في العقار اللي بتملكه. بتحاول ثريا إنها تجبر القسم والضباط اللي فيه على إخلاء المكان، لكن محاولاتها بتنتهي بالفشل، وبتضطر للسكن مع القسم في نفس المكان، الأمر اللي بيولد مجموعة من المواقف الكوميدية اللي –المفروض-أنها تستمر من بداية الفيلم لنهايته.
الأداء التمثيلي
لكن على الرغم من قوة القصة أو الفكرة، إلا أن الأداء التمثيلي البارد أحيانا، والمبالغ فيه جدا في أحيان تانيه، سقط بالفيلم في هوة من التكرار والمغالاة وعدم القدرة على تقديم أي نوع من الكوميديا، لدرجة أننا حسينا أن الفيلم فيه قصور كبير في السيناريو وطريقة رسم الشخصيات. لأن لو كان السيناريو أقوي من كده كان أكيد هايرسم خطوط أكتر كوميدية للأبطال.
فريق العمل
الفيلم من تأليف وإخراج روماني سعيد في أول تجاربه لإخراج فيلم طويل تجاري، وعلى الرغم من قوة العناوين اللي قدمها روماني في أفلامه القصيرة والتسجيلية السابقة، إلا أن ممنوع الاقتراب أو التصوير جاء كتجربة ضعيفة ولا ترتقي أنها تكون فيلم كوميدي متميز.
بيشارك في بطولة الفيلم بالإضافة لميرفت أمين يسرا اللوزي و هاني حسن الأسمر و بيومي فؤاد و زكي فطين عبدالوهاب و ياسر الطوبجي، وللأسف كان أداؤهم ضعيف وغير مقنع وغير كوميدي، حتي مع محاولات بيومي فؤاد والإيفيهات اللي بيقولها طوال الوقت كان مستوي الفيلم في الناحية الكوميدية أقل من المتوسط.
الموسيقي والديكورات
طبعا مع هبوط مستوي الفيلم على كافة الأصعدة، بيكون الكلام عن الديكورات والموسيقى التصويرية مجرد تحصيل حاصل، لأن حتي العناصر دي في الفيلم كانت ضعيفة وغير مجدية، ناهيك أن الجمهور لما بيدخل فيلم كوميدي مش بيكون مركز على الموسيقى والديكورات بالمقام الأول.
وأخيرا
كنا بنتوقع أداء تمثيلي أفضل، وإخراج أقوي، وفيلم بشكل عام أفضل بكتير من اللي شوفناه في (ممنوع الاقتراب أو التصوير). نتمني القادم من المخرج والمؤلف روماني سعيد يكون أفضل وأقوي.
علشان تبقي عارف: الفنان محمد الشقنقيري كان المفروض يشارك في العمل، لكن انشغاله بتصوير أعمال تانيه منعته من تصوير الفيلم واضطر يعتذر عنه.
