منورة بأهلها : عيني على أهل كايرو!
المسلسلات أنواع.. مسلسل تتفرج عليه وانت بتاكل أو بتعمل شغل مهم وراك، وتبص كل شوية علشان تتابع الأحداث وما تحسش أن فايتك حاجه.. و (منورة بأهلها) اللي يجبرك تركز وتتابع كل لقطة باهتمام شديد، وتسمع كل جملة حوار مرة واتنين علشان تبقى فاهم كل حاجه، وتشترك مع عشرات الأشخاص على السوشيال ميديا علشان تفسروا مع بعض الأحداث وتسالوا الأسئلة المهمة.
المسلسلات أنواع.. نوع (يسحلك) في جريمة قتل ويخليك عاوز تتفرج على كل حلقة علشان تعرف مين القاتل، و (منورة بأهلها) اللي يخلي جريمة القتل هي مجرد مدخل، لتشريح مجتمع كامل قايم على شبكة من العلاقات المترابطة، والاتفاقات السرية، والمصالح اللي بتوضح للمشاهدين حلقة بعد التانية.
لما نلاقي مسلسل عربي كان ممكن ياخد مليون طريقة سهلة للنجاح، واختار هو الطريق الأصعب، يبقى احنا بنتكلم عن تعاون بين اتنين مش بيحبوا السكك السهلة، يسري نصر الله مخرجاً، و محمد أمين راضي مؤلفاً.. وخصوصا راضي، اللي لسه بندور وراه لحد دلوقت على جثة (ٍسيد نفيسه) في مسلسل السبع وصايا اللي ألفه في ٢٠١٤.
“منورة بأهلها” بيحكي عن جريمة قتل بشعة لشاب غامض (قام بالدور محمد حاتم)، بيحقق فيها ظابط عاوز يوصل للحقيقة (أحمد صلاح السعدني)، علشان يلاقي نفسه وسط غابة من العلاقات المتشابكة، لتنظيم إجرامي غامض بيضم صفوة المجتمع.
القصة مش ببساطة السطور اللي حكيناها فيها، لكن بتدخلنا في سلسلة لا تنتهي من الصراعات والمؤامرات، بشكل يخلي كل حلقة تتفجر لنا فيه مفاجأة جديدة، وده عاوز مجهود اخراجي وتأليفي مذهل، ودي أقوى عوامل قوة (منورة بأهلها).
كل ده كان هايكون بدون لازمة منغير الأداء التمثيلي المميز. محمد حاتم بيتم اكتشافه من جديد وإعادة تقديمه كممثل تقيل وقادر على أنه يقدم لنا شخصية بحجم (مهاب منير)، باسم سمره وليلي علوي وغاده عادل هم كمان قدموا أداء رائع، بينما أداء سلوى خطاب كان في المنطقة العادية المتوقعة منها من ساعة ما قدمت (سجن النسا).
أما أحلى مافي (منوره بأهلها) هو قدرة المشاهد على تفسيره على أكتر من مستوى، إما بالمعاني المباشرة الظاهرة من الأحداث، أو على مستويات أعمق، دينية أو سياسية أو اجتماعية أو حتى في منطقة ما وراء الطبيعة. وعلى السوشيال ميديا هاتلاقوا عشرات التفسيرات والاجابات على أسئلة طرحها المسلسل، كل ده يحسب له ويعتبر نجاح كبير له أنه قدر يخلق حالة التفاعل دي على الأرض.
كل ده وسط ديكورات جميلة جدا، واختيار أماكن تصوير مميزة، مع حوار وموسيقى تصويرية من أحلى ما يكون. كل ده ساعد أن (منوره بأهلها) مايكونش مسلسل يتشاف ويتنسى بسهولة.
المسلسلات أنواع.. و (منوره بأهلها) من النوع النادر، المتعوب فيه، المُهتم بكل تفصيلة فيه، واللي صناعة كان ممكن يحققوا نجاح برضو لو مشيوا في السكة السهلة، لكنهم قرروا يقدموا عمل مختلف، وننتظر الموسم الثاني منه على أحر من الجمر.
