من فات قديمه تاه.. ٥ أعمال لسه صالحه للمشاهدة في ٢٠٢٣

المثل القديم بيقول (من فات قديمه تاه) والمقصود بيه، أن اللي بينسى أصوله وتاريخه، مش هايكون له حاضر ولا مستقبل.

والحقيقة أن الدراما المصرية مليانه أعمال نقدر نقول أنها خالدة في عقول وأذهان الناس. مش بس عند الشباب لكن عند كبار السن، وتقريبا كل الأجيال شافت الأعمال دي، لكن الفارق أن الأجيال الأكبر شافتها في وقت عرضها لأول مرة، وبعد كده الأجيال اللي بعدها شافتها في إعادة الأعمال على التليفزيون أو على يوتيوب.

تعالوا نستعرض مع بعض ٥ أعمال لا يمكن ننساها، لسه صالحة للمشاهدة في رمضان ٢٠٢٣

مسلسل رأفت الهجان

الأب الروحي لكل مسلسلات الجاسوسية العربية، والعملاق اللي تعلم منه كل صناع الدراما في مصر، مسلسل رأفت الهجان مش مجرد مسلسل اتعرض وصالح للعرض حتى يومنا هذا وبيحقق نسب مشاهدة ممتازه، لكنه درس عظيم في ازاي ممكن عمل درامي يسيب أثر لا يُنسى في ذهن كل اللي شافوه، ويزرع جواهم الانتماء وحب البلد، من خلال قصة الجاسوس المصري رفعت علي سليمان الجمال (محمود عبد العزيز) ورحلته المذهلة داخل أرض العدو بتعليمات من المخابرات العامة المصرية. غني عن القول أن المسلسل مأخوذ عن قصة حقيقية وشارك فيه نخبة من أحسن والمع نجوم مصر. منهم يوسف شعبان و محمد وفيق ومصطفى متولي ويسرا و صبري عبد المنعم وغيرهم.

مسلسل لن أعيش في جلباب أبي

لسه مع القصص الحقيقية، عن قصة نجاح رجل عصامي مكافح في عالم التجارة، من خلال قصة الشاب (عبد الغفور البرعي) اللي بيوصل وكالة البلح ويشتغل فيها صبي في ورشة بتبيع قطع غيار السيارات والحديد الخردة، لواحدة من أغنى التجار في مصر، عن قصة احسان عبد القدوس ومن بطولة نور الشريف وعبد الرحمن أبو زهرة وعبله كامل ومحمد رياض. ويكفي أننا نقول أن لحد النهرده ماحدش يقدر يفوت حلقة فرح سنية لو شافها على يوتيوب أو على قناة على التليفزيون بالصدفة!

فوازير المناسبات

كانت الفوازير واحدة من أشهر علامات الشهر الكريم. وفوزاير المناسبات كان لها مكانة خاصة بسبب تصميم الرقصات والأغاني المختلفة فيها. بالإضافة لحبكة كل فزورة واللي بتناقش مناسبة من المناسبات في مجتمعنا، والمشاهد عليه انه يستنتج ايه المناسبة دي ويبعت الحل على مبنى الإذاعة والتليفزيون عن طريق الواتس اب… (احنا بنهزر جمعاكم مكانش فيه حاجه اسمها واتس اب سنة ١٩٨٨. ومكانش فيه حاجه اسمها انترنت في مصر أصلا.. الأجوبة كانت بتتبعت بالبريد التقليدي) علشان يدخل في سحب للفوز بجوائز قيمة.

الفوازير كانت من بطولة يحي الفخراني وهاله فؤاد وصابرين ورجاء الجداوي وغيرهم من نجوم الفن. ولسه الفوازير بتتشاف لحد النهردة على قنوات زمان، وعلى اليوتيوب

كارتون بكار

أحلى برنامج ترفيهي للأطفال في شهر رمضان كان مسلسل بكار، المسلسل الكارتوني الأشهر بأيدي مصرية ١٠٠٪ وده كان تحدي كبير في وقتها،  وبغناء تتر مميز لمحمد منير، وكان الأطفال بيقضوا أمامه وقت ممتع ويسيبوا الكبار للعزومات وخلافه.

كارتون بكار لسه بيتعرض لحد  وقت قريب، بس النسخة الأولى منه هي الأفضل، ولسه بتتشاف لحد دلوقت على يوتيوب وغيرها من القنوات المهتمة بعرض الأعمال القديمة

الكاميرا الخفية

وأخيرا.. البرنامج خفيف الظل اللي لسه بيحقق مشاهدات لحد النهرده. واللي كان بيقدمه النجم الراحل إبراهيم نصر، وكان سبب انطلاق شهرته في مصر والوطن العربي.

الكاميرا الخفية نفسها كفكرة برنامج مقالب، بتتقدم من قبل كده بكتير، ولحد دلوقت فيه منها نسخة شهيرة هي برامج رامز جلال، لكن عندنا اعتراض كبير على الطريقة اللي بتتنفذ بيها حاليا.

نسخة إبراهيم نصر في رأينا اكتر نسخة قابلة للمشاهدة لحد النهرده. لأن خفة الدم اللي فيها لسه بتضحكنا لحد دلوقت من خلال المواقف اللي بتعملها (زكية زكريا) بدون أي إهانة أو استهزاء بالضيوف زي ما بيحصل مؤخرا.