مواقع وصفحات تعلمكم أحلى الوصفات
زمان اشتهر كتاب (أبلة نظيرة) الخاص بالطعام، وجيل بعد جيل توارثوا كتب مليانه بوصفات الأطعمة الحادقة والحلوة على اختلاف أنواعها. ومن الكتب دي كون ألاف الولاد والبنات مشاعر إيجابية ناحية أكلات بعينها كونت طعم طفولتهم. والنهردة لما أصبح الجيل ده أباء وأمهات، جه الوقت علشان يقدموا لأولادهم وصفات جديدة ومختلفة.
وزي ما اختلفت طرق الطهي وأدواته، اختلفت طرق الحصول على الوصفات. وأصبحت الأنترنت هي البديل العصري للكتب والمجلات القديمة. تعالوا نشوف أشهر وأقوى صفحات ومواقع الطبخ.
كوكباد
من أشهر مواقع الطبخ اللي ممكن نقابلها أونلاين. مئات من الوصفات اللي بتناسب كل الميزانيات والثقافات، والأحلى أن كوكباد مش بس مجرد ويب سايت، لكنه تطبيق قابل للتحميل على أجهزة أندرويد وابل وغيرها من التليفونات، وبكده يكون كل شخص معاه مئات الوصفات في جيبه حرفيا!
كوكباد بيتيح الفرصة لأي شخص أنه يضع أي وصفة ويشرحها بطريقته ولغته الخاصة كمان، ومن خلال التقييمات والتعليقات اللي بيسيبها باقي المتابعين بنقدر نكون رأي عن الوصفة. والموضوع ده زي ما هو ميزة بتحقق التنوع وبتقدم لنا أطباق من كل الجنسيات والثقافات، لكن في نفس الوقت فيها عيب كبير في اختلاف طرق الوصف من شخص للتاني واختلاف اللهجات المحلية والأخطاء المطبعية.
لكن الميزة الأكيدة في كوكباد أن الواحد لو حتى مش عارف يعمل كباية شاي كشري… هايتلاقى لها وصفة في كوكباد!
وصفات كنور
شركة كنور بتقدم لمحبي الطعام قسم خاص أسمه مطبخ كنور. وهو عبارة عن موقع كامل بيقسم وصفات الطعام حسب الفئات زي الشوربة والمقبلات والأطباق الرئيسية..الخ
الميزة في مطبخ كنور هي الاحترافية اللي بنلاحظها في طريقة عرض وكتابة الوصفات، وكمان شعورنا بالثقة في شرح الوصفات وفى مدى قوتها، كمان كنور بتقدم صفحة على يوتيوب نقدر من خلالها نتابع أحدث الوصفات وطريقة عملها.
لكن بيبعيب الموقع في النهاية أنه مش بيوفر خدمة التعليقات أو التجاوب مع الوصفات المختلفة علشان نعرف رأي الجمهور فيها ومدى قوتها.
وصفات نستله
نستله الشركة العالمية الرائدة في كتير من المنتجات اللي لها علاقة بحياتنا اليومية. نستله بتقدم لمحبيها موقع خاص بالوصفات، بتقدم من خلاله مجموعة كبيرة من الوصفات واللي بيتم عرضها في الموقع بطريقة سهلة ومحببة.
المميز في الموقع أننا ممكن نوصل لاي وصفة بسهولة ويسر، سواء باستخدام ميزة البحث أو حتى من خلال التصنيفات الكتيرة اللي بيقدمها الموقع ومن أهمها تصنيفات الطعام الصحي والطعام الخاص بالأنظمة الغذائية (الدايت).
لكن ها نلاحظ في كتير من الوصفات اعتمادها بالأساس على منتجات نستله، وده أمر تسويقي مفهوم بما اننا في النهاية في موقع تابع لنستله.
قسم الطبخ في فتاكات
أما محبي التجارب الاجتماعية اللي بيغلب عليها طابع الدردشة مع ناس كتير مهتمين بالطبخ والوصفات، هايلاقوا ضالتهم في قسم المطبخ في فتاكات. والحقيقة أن قسم الطبخ هناك هو القسم الأكتر احترافية من حيث تقديم تجارب طبخ (حقيقية) من بيوت مصرية وعربية عادية بعيدا عن االلي بيحصل في برامج الطبخ على التليفزيون.
لكن في نفس الوقت بيعيب الصفحة عدم قدرتها على تصنيف الوصفات بشكل سهل ومناسب على الرغم من محاولات القائمين على الموقع عرض الوصفات المهمة في أعلى الصفحة بشكل مستمر ومحدث دايما.
