نصائح اختيار اللابتوب المناسب لعام ٢٠١٨
على الرغم من انتشار أجهزة الهواتف الذكية وأجهزة التابلت، إلا أن اللابتوب هو الجهاز المناسب لإنجاز الأعمال المهمة – أو حتى مشاهدة الفيديوهات والأفلام- على شاشة كبيرة نسبيا وبإمكانيات أفضل من إمكانيات التابلت.
علشان كده بنقدم لكم من خلال موضوعنا مجموعة نصائح مهمة جدا عند شراء لابتوب جديد علشان تعرفوا تحددوا اللابتوب المناسب لكم ولأحتياجاتكم.
حدد ميزانية مناسبة
تحديد الميزانية اللي هاتشتري بيها اللابتوب من أهم الأمور اللي هتساعدك على الأختيار. لأن السوق مليان أجهزة من أول حوالي 3000 جنيه الى أزيد من 80 ألف! بالتالي لو لم تحدد ميزانية من البداية هاتلاقي نفسك تايه في بحر واسع.
كمان لازم الميزانية تكون قابلة للزيادة أو النقص شوية. يعني بلاش تحدد الميزانية بأخر فلوس معاك علشان دايما شراء لابتوب جديد بيصاحبه شراء بعض الإكسسوارات زي الشنطة أو السماعات الخارجية.. الخ بالتالي بلاش تشتري بكل الفلوس اللي معاك.
حدد الغرض من شراء لابتوب
قبل ما تبدأ عملية الشراء نفسها لازم تسأل نفسك إنت ليه بتشتري لابتوب؟ السؤال هايخليك تحدد الميزانية المناسبة والمواصفات اللي تخدم إستخدامك. يعني لو بتشتري لابتوب علشان بتتحرك من مكان لمكان وعاوز جهاز كمبيوتر معاك هاتفضل الحجم الصغير والوزن الخفيف على الإمكانيات العالية… وهكذا
حجم الشاشة VS وزن الجهاز
على الرغم من أن حجم شاشة اللابتوب الكبير بتوفر مشاهدة أفضل للفيديوهات والأفلام. لكن كل ما بيزيد حجم الشاشة بيزيد وزن الجهاز. علشان كده بننصح بضرورة عمل موازنة بين شاشة اللابتوب وبين الوزن. وبشكل عام الأوزان الكويسة مع أحجام الشاشة المناسبة بتكون في حدود من 13 الى 15 إنش. ودي أحجام الشاشة اللي هايكون وزن اللابتوب مناسب لها في نفس الوقت لسهولة حمله والتنقل به.
سرعة المعالج VS سرعة الرامات VS السعر
سرعة معالج الجهاز تعتبر من أهم العوامل اللي بتخلي المستخدمين تقبل على الشراء. علشان سرعة المعالج بتوفر سرعة أكبر في تشغيل البرامج التقيلة زي برامج مونتاج الفيديو وتعديل الصور. لكن من ناحية تانيه اختيار الرامات السريعة بيقدم سرعة أعلى في فتح الجهاز وقدرة أكبر على تشغيل أكتر من برنامج في نفس الوقت.
علشان كده بننصح باختيار متوازن بين سرعة المعالج وبين الرامات. وبلاش نعلى واحدة فيهم على حساب التانيه علشان الأتنين مهمين. أما لو اختارنا أعلى رامات وأعلى سرعة للمعالج في الحالة دي السعر هايرتفع بشكل كبير.
إستخدم برامج أصلية
بما إنك بتشتري جهاز جديد. يستحسن تتنازل عن بعض الفلوس الإضافية وتشتري بعض البرامج الأصلية اللي لا غنى عنها زي نظام التشغيل ومكافح الفيروسات وبرامج تحرير المستندات والصور – لو كنت بتستعملهم- وعلى الرغم من أن الموضوع ده ممكن يكون مكلف لكن استخدام برامج غير أصلية بيضر الجهاز على المدى الطويل وبيقلل من كفاءة استخدام اللابتوب وبيحرمك من التحديثات الأصلية اللي بتيجي مع المنتجات.
