نص جوازه: فيلم رومانسي بشكل مختلف
هل لو فقدنا ذاكرتنا هايرجع بينا الزمن علشان نتخذ نفس القرارات القديمة اللي أخدناها قبل كده؟ إجابة السؤال ده وأسئلة تانيه كتير تعتبر المحور اللي ارتكز عليه فيلم نص جوازه واللي هانتكلم عنه بشكل موسع أكتر من خلال موضوعنا.
القصة
الفيلم بيحكي عن زوجين بيتعرضوا لحادثة بيترتب عليها فقدانهم للذاكرة، الأمر اللي بيتسبب في مجموعة لا تنتهي من المواقف الكوميدية والتراجيدية اللي بتستمر على مدار أحداث الفيلم اللي بتكون في حوالي ساعة ونصف.
فريق العمل
الفيلم من اخراج سيف الساحر ومن تأليف أحمد مجدي وبطولة رحمة حسن ونبيل عيسى ومصطفى أبو سريع و ليلي عز العرب و سلوى عثمان.
الأداء التمثيلي
نبيل عيسى بيحاول يجرب أدوار مختلفة عن نوعية الأدوار اللي بيقدمها مؤخرا، والحقيقة أن نبيل فنان قوي لكن نقدر نقول أنه مظلوم في بعض الاختيارات اللي بيقوم بيها مؤخرا، لكن بشكل عام نبيل قدم دور مميز وجميل، رحمة حسن كمان قدمت دور جيد وهي كمان بتحاول تقدم تنويعات مختلفة عن باقي أعمالها.
مصطفى أبو سريع قدم أداء نمطي ومتوقع منه، والحقيقة احنا مش عارفين ليه مصطفى مُصر يقدم أداء نمطي بعد ما جرب يقدم أنماط مختلفة وتأكدنا معاه أن موهبته الفنية لا غبار عليها.
السيناريو والحوار والأخراج
سيناريو الفيلم وحواره من كتابة منة الله عبيد، وهي شابة صحفية زميلة بتخوض تجربتها الأولى في الكتابة للسينما، والواضح أن تجربتها جريئة وقوية، وبتفكرنا بتجربة بنت تانية كانت بتكتب هي كمان للسينما لأول مرة وخرج مشروعها قوي ومميز، وبنقصد هنا ايناس لطفي وفيلمها (بشتري راجل)، الأخراج كمان قدر يقدم فيلم متوازن بين أنه بيحكي قصة وأنه بيقدم عمل خفيف للجمهور.
الديكورات والموسيقى والأزياء
ديكورات الفيلم كانت جيده وكنا بنتوقع الأفضل من الموسيقى التصويرية لكن بشكل عام جاء مستوى الفيلم جيد ويصلح للمشاهدة في نهاية الأسبوع.
الخلاصة
نص جوازه فيلم جيد وخفيف وننصح بمشاهدته مع الناس اللي بنحبهم.
علشان تبقى عارف:
مصطفى أبو سريع واحد من أبطال الفيلم بدأ حياته الفنية من خلال أداء شخصيات في الأعلانات، ثم اتجه لتمثيل أدوار صغيرة في بعض المسلسلات قبل ما يقدم دوره الأهم في مسلسل الأب الروحي.
