هتشتري بلاي ستيشن؟ خد بالك من شوية حاجات في ٢٠١٨

فكرة غلط منتشرة بين ناس كتير أن البلاي ستيشن جهاز ألعاب للصغار في السن. لكن الفكرة دي غلط وكل واحد جرب يلعب بلاي ستيشن عارف أنها غلط. علشان كده الاقبال على شراء أجهزة بلاي ستيشن بيكون من الكبار والصغار على حد سواء. وخاصة في شهور الصيف. علشان كده هانقول لكم في الموضوع ده على بعض النصائح اللي لازم تاخدوا بالكم منها قبل شراء بلاي ستيشن.

الشراء من الخارج

بعض الناس بتشوف عروض مغرية وتخفيضات على سعر الأجهزة من خارج مصر. لكن في نفس الوقت بتخاف من عدم توافق الأجهزة دي مع مصر. لكن الحقيقة وعن تجربة أننا اشترينا بلاي ستيشن من أمريكا واشتغل في مصر تمام. لكن لازم تقروا الكتالوج كويس قبل التوصيل علشان تتأكدوا من توافق كهرباء الجهاز مع الكهرباء في مصر. كمان لازم تتأكدوا من Regionالجهاز وهو رقم بيحدد مدى توافق الجهاز مع الألعاب اللي بيتم شرائها من كل دولة.

مستعمل ولا جديد؟

البعض بيجد عروض شراء بلاي ستيشن مستعمل بأسعار مغرية. وده بيخلي ناس كتير تسأل المستعمل أفضل أم الجديد؟ لو الميزانية تسمح لك تشتري جهاز جديد ما تترددش أبدا في الشراء. لكن لو عاوز تشتري مستعمل تجنب الشراء من التجار المحترفين أو شراء الأجهزة اللي بتبيعها محلات البلاي ستيشن لأن معدل استخدامها بيكون سيء جداً. وحاول تقصر الشراء على الأقارب أو الصحاب اللي واثق في أمانتهم وطريقة استخدامهم للأجهزة.

شراء أسطوانات أم تحميل ألعاب؟

من أهم الأسئلة اللي هاتصادفها: هل اشتري أسطوانة ألعاب أم أشتري الألعاب أونلاين وأحملها على الذاكرة الداخلية للبلاي ستيشن؟ لو مساحة الهارد ديسك الخاصة بالجهاز قليلة (500 جيجا مثلا) بننصحك بالاعتماد على الأسطوانات. أما لو المساحة كبيرة (1 تيرا) أو تقدر توصل هارد خارجي بمساحة كبيرة ممكن في الحالة دي تحمل الألعاب من على الأنترنت لكن لازم نلفت نظرك لأن مساحة الألعاب بتكون كبيرة (أحيانا بتقرب من 100 جيجا) بالتالي لازم يكون عندك اشتراك سريع في الأنترنت ومساحة تحميل كبيرة علشان لا تمر بمواقف صعبة في التحميل.

أعدل الجهاز بتاعي ولا أسيبه بحالته؟

بعض الإعلانات على صفحات الفيس بوك والجروبات بتعمل عروض لتعديل أجهزة البلاي ستيشن بحيث يتم وضع ألعاب عليه بدون شرائها. والموضوع ده مش بننصح به أطلاقا. أولا لأن فيه اعتداء على حقوق الملكية الفكرية للشركات المصنعة للألعاب، وثانيا علشان التعديل ده بيخلي الجهاز لا يقبل الدخول على الأنترنت ابدا بالتالي هاتخسر كل مميزات اللعب أونلاين أو حتى تحميل الألعاب المجانية والجديدة لما تنزل على الأنترنت.

ممكن أكسب فلوس من اللعب؟!

على الرغم من أن ناس كتير بتعتبر البلاي ستيشن مجرد تضييع للوقت، لكن ناس كتير قدرت تحقق مبالغ مالية كبيرة من مجرد ممارسة الألعاب الالكترونية وتصوير لعبهم وبثه على مواقع الفيديو زي Youtube أو حتى المنصات المتخصصة في بث الألعاب اونلاين زي منصة twitch اللي بتعطي مبالغ مالية للاعبين مقابل بث لعبهم على الأنترنت وفقا لعدد المتابعين لهم. ده غير مميزات تانية كتير لو كنت لاعب محترف وطريقة لعبك قوية ومختلفة.