ولاد رزق 2 : البطولة الجماعية راجعه تاني
واحد من أهم عوامل نجاح أي فيلم هي أن كل المشاهد تكون مترابطة مع بعضها وبتخدم الهدف النهائي للفيلم وهو تقديم حدوته مختلفة بشكل مختلف وجديد. لكن مشكلة ولاد رزق ٢ أن جزء كبير من مشاهده كان منفصل عن بعضه ومش بيخدم قصة الفيلم.
ولاد رزق ٢ بيحكي عن حياة أولاد رزق بعد نجاح مهمتهم الأخيرة، وبعد قرارهم التوقف عن الأعمال غير المشروعة. وأزاي أثر ده على حياتهم بشكل سلبي. الأمر اللي هايخليهم يوافقوا على عرض الظابط رؤوف (محمد ممدوح) علشان ينفذوا عملية جديدة… وكبيرة.
نقدر نقسم الفيلم لمجموعة فصول. كل فصل منهم بيحكي حكاية. ده عادي ولا يعيب أي فيلم. لكن اللي يعيب ولاد رزق ٢ أن بعض الفصول دي مش مترابط ومش بيخدم السياق العام للقصة. وبعض الشخصيات لو أتلغت تماما أو أتبدلت بشخصيات تانيه خالص كان الفيلم هايستمر بدون أي اختلال (نقصد غاده عادل في دور نانسي).
بالنسبة للأداء التمثيلي. أحمد عز وعمرو يوسف عاملين دويتو سينمائي قوي وجميل. أحمد الفيشاوي مساحة دوره مش أد موهبته الكبيرة. كريم قاسم قدم دور جامد جدا ومساحة دوره ساعدته على ده. لكن مفاجأة الفيلم كانت في أحمد داوود اللي قدم دور مختلف وممتاز الى أقصى درجة. وخالد الصاوي لا يمكن ننسى دوره اللي على الرغم من قلة عدد مشاهده لكنه كان مؤثر جدا في الأحداث وده العادي من خالد الصاوي وافتكروا دوره القصير والقوي في الفيلم الأزرق٢
على الرغم من قوة الأدوار الذكورية في الفيلم لكن الأدوار النسائية كانت ضعيفة جدا. نقصد هنا غاده عادل وريم مصطفى. ده مش لضعف موهبتهم لكن لقلة المساحة المخصصة لأدوارهم.
ولاد رزق٢ نجح يقدم كل حاجه شوفناها في الجزء الأول بكمية أكبر. مطاردات أكتر. أكشن أكتر. وموسيقى تصويرية أحلى وألفاظ ومشاهد جريئة أكبر. لو عجبكم الجزء الأول هاتلاقوها بكمية أكبر في الجزء الثاني.