يجعلو عامر: عيش كل يوم كأنه أخر يوم!

مين اللي قال أن الأفلام القوية بتعتمد فقط على الفكرة الكويسه؟ حتى لو كان عندك فكره كويسه لكن ممثلين فاشلين وسيناريو واقع وإخراج ضعيف، هاتكون النتيجة في النهاية عمل باهت، لا قادرين نقول عليه سىء جدا، وعمره ما هايرتقي انه يكون فيلم ممتاز!

فريق العمل

فيلم يجعلو عامر من بطولة أحمد رزق وبوسي، وبيومي فؤاد وهشام إسماعيل ومحمود الليثي، ومن إخراج شادي علي وتأليف سيد السبكي. وبيشارك في بطولة الفيلم نرمين ماهر والراقصة داليدا أنستازيا، واللي بتقدم رقصة في أحداث الفيلم.

القصة

يجعلو عامر بيحكي عن الشاب (عامر)، واللي بيعيش حياة رتيبة مع زوجته (بوسي). واللي بتختلف عنه تماما في نمط الحياة، فعلى الرغم من أن عامر محافظ جدا ومش عاوز يعمل أي نشاط بره البيت علشان خايف من التفجيرات والعمليات الإرهابية.

بعد كده بيحصل انقلاب في حياة عامر، لما بيكتشف اصابته بمرض خطير، وأمامه وقت قليل جدا علشان يعيش. ساعتها بيبدأ عامر في تغيير نمط حياته بنسبة 100%. ياترى ها يعمل ايه؟ وها يكتشف ايه؟ هو ده اللي ها نعرفه من خلال أحداث الفيلم.

الإخراج

إخراج الفيلم كان ضعيف جدا. وتصميم كتير من المشاهد كان لازم يكون أفضل، كمان ترتيب المشاهد وتظبيط الـ(ستوري بورد) الخاصة بالفيلم كان في قمة السوء، والستوري بورد هو تناسق مشاهد الفيلم واستمراريتها على الشاشة، وهى خطوة من الخطوات اللي بتيجي بعد السيناريو علشان توصل لإخراج جيد للفيلم.

السيناريو والحوار

السيناريو والحوار الخاصين بالفيلم كانوا في أضعف حالاتهم، واعتمدت الكوميديا في الفيلم على كتير من التلميحات والمواقف الجنسية، بل ممكن نقول أن العامل الجنسي بالكامل كان مقحم بشدة على السيناريو، أما لو هتسألونا عن أكتر شيء مقحم غير الجنس في الفيلم، فكان الرقصات والاستعراضات. واللي تم اقحامها اقحاما في الفيلم بدون أي مناسبة، لمجرد إن الفيلم فيه نجمة ونجم من النجوم الشعبيين.

الموسيقى والديكور

طبعا مع فيلم زي يجعله عامر، بيكون من الصعب أننا نتكلم عن الموسيقى والديكور، علشان لم يكن هناك أي اهتمام بيهم على الإطلاق للأسف الشديد. لكن الأغاني في الفيلم من نوعية الأغاني اللي بيتم تقديمها في الأفراح، وجمهور النوعية دي من الأغاني ها يعجبهم اللي ها يشوفوه في الفيلم.

الخلاصة

يجعلو عامر، فيلم ضعيف على كافة المستويات، لكن كان ممكن يكون أفضل بكتير من اللي شوفناه، لو كان تم استغلال الفكرة اللي فيه بشكل اقوى.

علشان تبقى عارف: الفنان أحمد رزق من الممثلين المصريين المشهورين، وعلى الرغم من أنه بدأ حياته الفنية في التسعينات، إلا أن الجمهور عرفه من خلال أفلام (علشان ربنا يحبك) و (فيلم ثقافي) واللي تم تصويرهم سنة 2000 أما دوره في فيلم (مافيا) فكان نقطة انطلاق حقيقية له.