10 Cloverfield Lane : مابعد نهاية العالم
الجميل والمميز فى بعض أفلام هوليود، هو قدرتها على تحقيق نجاح كبير بميزانية محدودة، والقدرة على إثارة الجدل وتقديم المتعة للمشاهد بإستخدام أقل عدد ممكن من الممثلين، وأقل قدر ممكن من مشاهد التصوير الخارجية، ولعل أكبر الأمثلة على كلامنا فيلم Buried اللى تم تصويره فى مكان واحد ومن بطولة ممثل واحد! ويعتبر واحد من أقل الأفلام الأمريكية تكلفة على الإطلاق… فيلم اليوم بينمني لنفس الفئة دي من الأفلام.
الفيلم اللى أخرجه دان تراشتبرج و قام ببطولتة ماري اليزابث وينستد و جون جودمان بيبدأ بمشاهد إفتتاحية لسارة (ماري اليزابث) وهى بتتجه بسيارتها على الطريق السريع هرباً من علاقة فاشلة مع حبيبها اللى بيحاول يكلمها طوال الوقت.. أثناء إنشغالها بالرد على مكالمته بتتعرض لحادث ضخم بيخلى سيارتها تخرج عن الطريق السريع وبتقع فى غيبوبه.
لما بتصحي من غيبوبتها بتكتشف نفسها فى مكان غريب مع رجل أغرب، وبيحكي لها حكاية من أغرب الحكايات اللى ممكن تسمعها: العالم تعرض لهجوم من كائنات فضائية أثناء سقوطها فى الغيبوبه، والبيت اللى هى عايشه فيه هو واحد من أخر الملاجىء الأمنة على الأرض، وهو عباره عن منزل كامل تحت الأرض فيه كمية كبيرة من الأكل والشرب مع فتحات تهوية وأدوات إعاشة كاملة.
الفيلم بياخدنا بعد كده فى رحلة نفسية داخل (سارة).. هل الكلام اللى بتسمعه ده صحيح؟ وهل فعلاً العالم إنتهي وهى غايبة عن الوعي؟ وإيه مصير الناس اللى خارج المنزل ده؟ كل ده بيتزامن مع محاولة سارة دراسة نفسية الناس اللى اصبحوا أسرتها فى الملجأ اللى هى عايشه فيه تحت الأرض، وتطورات المواقف اللى مش بتتركنا مع دقيقة واحده من الملل.
الفيلم بينتمي فى جزء كبير منه لما يمكن إننا نسميه : أفلام الدستوبيا، وهى أفلام بتناقش نهاية الحياة على الأرض بالشكل اللى إحنا نعرفه، ولعل أشهر الأمثلة على الأفلام دي فيلم Mad Max واللى حصل على عدد كبير من جوائز الأوسكار فى الحفل الأخير.
الأداء التمثيلي لكل الأبطال كان قوي جداً ومتميز، وخاصة جون جودمان اللى قدر يقدم شخصية مركبة وصعبة التقديم على الشاشة، بتتراوح مابين العصبية الشديدة أحياناً والطيبة المُطلقة أحيانا، وساعده السيناريو اللى ركز على شخصيتها وأخدها محور إنطلاق لتغييرات كتيره فى الأحداث، وقدر السيناريو يعطيه الفرصة كاملة لأداء شخصيته على الشكل الأمثل.
بنعيب على الفيلم المشاهد الأخيرة منه، واللى حسينا فيها بكتير من الفبركة و الإستسهال فى التنفيذ، والحقيقة إننا مش هانقدر نحكي كتير عن الجزء الأخير من الأحداث علشان ما نحرقش أحداث الفيلم عليكم، لكن لما هاتشوفوا الفيلم هاتفهموا إحنا قصدنا إيه، لكن عيوب المرحلة الأخيرة من الفيلم ما تخليناش ننكر إنه فيلم جيد ومثير على الرغم من قلة ميزانيته وعدد أبطاله.
10 Cloverfield Lane فيلم خفيف بيتلاعب بنفسية وعقلية مشاهديه، بنرشحه للمشاهدة فى ليله عاوزين تقضوا فيها وقت ممتع بدون تفكير كتير أو حبكات سينمائية (مكلكعة) تستعصى على الفيلم.. وياريت صناع الأفلام فى مصر يلتفتوا للإسلوب ده فى صناعة أفلام بميزانية محدودة وممتعه فى نفس الوقت.
