1917 : فيلم الأوسكار ولا ايه؟!
على مدار تاريخنا في قسم الأفلام في كايرو٣٦٠ عدد الأفلام اللي حصلت على تقييم ٥ نجوم كاملة كان قليل جدا. والقرار بيكون صعب علشان نعطي الدرجة كاملة لفيلم ما لكن الغريب في 1917 أننا أعطيناه التقييم كامل بدون تفكير! ولو كان عندنا نجمة سادسة كان هياخدها بمنتهى السهولة!
1917 بيحكي عن قصة بسيطة لجنديين بريطانيين بيتم تكليفهم بمهمة في غاية الخطورة. لو تمت بنجاح هايتم انقاذ ألاف الأرواح من الموت المحقق. لكن المهمة مش سهلة إطلاقها وفيها مخاطر كتير.
زي ما قولنا القصة بسيطة جدا ومافيهاش أي تعقيد. لكن الرحلة الخطيرة اللي أخدنا فيها المخرج العبقري سام ميندز -وهو بالمناسبة مخرج فيلم Skyfall- رحلة غير تقليدية. وكل عوامل العبقرية كانت فيها.
بداية بالتصوير الرائع اللي اعتمد على فكرة اللقطة الواحدة One shot وده أسلوب في التصوير بيخلي المشاهد يحس انه دخل الأحداث مع الممثلين وأنه مش مجرد قاعد يتفرج عليهم. على الرغم من أننا مش بنشوف الخلفية اللي بييجي منها الجنديين أبطال الفيلم لكن بنحس بالتوحد معاهم والرغبة أننا نكون مكانهم في بعض المشاهد.
التصوير لايمكن ينجح بدون اختيار البيئة المناسبة. والفيلم قدم لنا أكثر من بيئة مختلفة بتدور فيها الأحداث. مع كادرات وحركة كاميرا أكثر من رائعة. كل ده بدون (فذلكه) على المشاهدين.
لا يمكن ننسى الموسيقى التصويرية الأكثر من رائعة. الموسيقى اللي عارفه امتى تبقى عالية ومسيطرة على المشهد وأمتى تقل وأمتى تسكت خالص علشان تخلينا نستمتع بالأحداث.. ناقص حاجه ماقولناش عليها عبقرية؟ الأداء التمثيلي.
الأداء التمثيلي لأبطال الفيلم دين تشارليز تشابمان و جورج ماكاي كان أكتر من رائع. أداء مميز هادي بيعلى مع الأحداث واحدة واحدة بدون عصبية أو افتعال. وقربنا من الحالة النفسية والإنسانية للجنود في الحرب العالمية وفي أي حرب عموما.
1917 فيلم جيد عن حرب قبيحة. حرب نحب نقرأ عنها ونشوف أفلام لكن مانحبش نكون جزء منها أبدا. ننصحكم بمشاهدة الفيلم بدون تأخير. وياحبذا لو على شاشة الأيماكس الضخمة.
