2 Guns: هكذا يكون الأكشن!
على الرغم من زحمة أفلام العيد اللى أخذت فى وشها بعض الأفلام زى Gravity اللى يعتبر واحد من أحسن الأفلام اللى نزلت مؤخرًا، إلا أن 2 Guns لا يزال بـ يحقق نسب مشاهدة كويسة تناسبًا مع الوقت اللى نزل فيه، وشوفنا عدد من المشاهدين بـ يسألوا عن الفيلم بالاسم، وطبعًا فرحنا للإقبال على فيلم محترم على الرغم من كمية الأفلام الهابطة اللى نزلت فى العيد مؤخرًا.
الفيلم من بطولة العبقرى دينزل واشنطن والمجتهد مارك والبيرج، الأول اعتلى سلم النجومية من زمان والثانى فى طريقه لنفس المكانة قريبًا، بالتالى الفيلم كان مباراة متميزة فى التمثيل بين الاثنين، والمخرج بالتسر كورماكور قدر يعمل دويتو فنى متميز فى فيلم بـ يحكى عن ضابط مخابرات بحرية وضابط فى مكافحة المخدرات بـ يسعوا للإيقاع بشبكة مخدرات ضخمة من خلال سرقة بنك بدون ما كل واحد يعرف أنه بـ يشتغل فى النهاية مع عميل للحكومة.
الجميل فى الفيلم أنه بـ يأخذنا من نقطة للثانية والانتقال بين المشاهد تم بعفوية وسهولة جميلة جدًا، لكن حسينا فى الربع الأخير من الفيلم أن الأحداث كانت Over شوية وغير منطقية ، وحسينا عند لحظة معينة أن الولايات المتحدة بكامل أجهزتها توحدت ضد البطلين غير القابلين للخدش لأن المخرج عاوز كده، وده كان من نقاط ضعف الفيلم.
الموسيقى التصويرية والديكور لعبوا دور مهم فى الفيلم، وممكن نقول أن الموسيقى دورها كان أهم إلى حد ما من الديكور رغم أهمية الاثنين فى العمل السينمائى.
لو بـ تقبلوا نصيحتنا، نرشح لكم 2 Guns للمشاهدة بدلاً من أى فيلم من أفلام العيد العربي… على الأقل هـ تشوفوا فيلم أكشن محترم ومسلى وممتع.
