21 Bridges : نظرة مختلفة على مدينة نيويورك
مش بنقدر نمنع نفسنا عن الوقوع في حب الأفلام اللي بتدور أحداثها في ليلة واحدة. خاصة لو كانت الأحداث بتدور في إطار الحركة والأكشن. وهو ده اللي قدمه لنا 21 Bridges
21 Bridges بيحكي عن قصة رجل الشرطة أندريه دافيس (قام بالدور شادويك بوسيمان) واللي بيخش في صراع مع الزمن علشان يقبض على مجموعة من المجرمين قاموا بعملية سطو مسلح وقتلوا فيه رجال شرطة.
رحلة البحث عن الجناة مش بس بتاخدنا في جولة مختلفة في مدينة نيويورك، لكن كمان بتدخلنا في جوانب مختلفة ومظلمة من نفسية ابطالنا. وهنا تيجي مشكلة المخرج بريان كيرك وهي أنه كان مصمم طول الوقت يلتزم بالخيط الأساسي للأحداث ولم يعطي لاكتشافات المشاهدين لخفايا الأحداث اهتمام من الناحية الإخراجية.
وفي النهاية حسينا أن الفيلم من ناحية السيناريو مشتت مابين محاولة انه يقدم مشاهد أكشن وعنف، وبين أنه يقدم أحداث تشويق وإثارة. وفي النهاية خرج الفيلم بمحاولات ضعيفة على الناحيتين!
الأداء التمثيلي لـ شادويك بوسيمان كان مميز. وكان جميل اننا نشوفه بره شخصية “الفهد” اللي بيلعبها في سلسلة أفلام Black Panther. والحقيقة أن بوسيمان قدر يقدم دوره المركب بشكل جيد ويقنعنا بالشخصية لدرجة كبيرة.
على الرغم من محاولة الفيلم تقديم صورة مختلفة لنيويورك بدون تزويق مبالغ فيه أو تقليل كبير من شأن المدينة. لكن ماشوفناش اهتمام كبير باللقطات أو المشاهد بالزاوية الواسعة أو المشاهد البانورامية للمدينة. على العكس من الاهتمام بإخراج مشاهد الأكشن والأشتباك واللي لازم نأكد على أنها دموية جدا ومش هاتناسب كل المشاهدين.
21 Bridges مش افضل فيلم أكشن شوفناه في حياتنا. لكنه فيلم يصلح للمشاهدة في الويك اند مع حبكة سهلة الفهم وأحداث مافيهاش لف ودوران كتير.
