47 Meters Down: Uncaged : سمك القرش متضايق من مستوى الفيلم!
الأفلام اللي بتحكي عن أفلام قرش بتهاجم مجموعة كبيرة أو صغيرة من الأفراد مش جديدة. ونقدر نقول أنها مضمونة النجاح ومنخفضة الميزانية. علشان كده هانشوف كل سنة فيلمين أو تلاته بيتكلموا عن نفس الموضوع لأن المعادلة دي شبه مضمونة النجاح.
وعلشان كده لما يفشل فيلم زي 47 Meters Down: Uncaged بنحس أن مالوش عذر. خاصة وأنه يعتبر إعادة تقديم لفيلم 47 Meters Down واللي قدر يحقق نجاح كبير بميزانية منخفضة. يعني المفروض أن الفيلم كان معاه كل مقومات النجاح.
47 Meters Down: Uncaged بيحكي عن مجموعة أصدقاء بيقرروا أستكشاف كهف كبير في مدينة أثرية تحت الماء. لكن المغامرة بتتحول لكارثة مع هجوم القرش عليهم. القرش اللي لو شاف مستوى الفيلم كان ممكن يهاجم المخرج شخصيا!
لما بنتكلم عن ضعف مستوى الفيلم بنقصد أن حبكة الفيلم مش بتتبلور غير بعد نصف ساعة من الأحداث تقريبا. بينما احنا مش محتاجين كل الوقت ده علشان نعرف أن البنات هاتغوص تحت الماء وتقابل القرش! كل ده واضح من التريلر أساسا!
كمان المستوى التمثيلي لأبطال الفيلم صوفي نيليس و كارين الفكس وباقي بطلات الفيلم كان ضعيف جدا. وده المتوقع من أبطال كل المطلوب منهم يمثلوا حالة الفزع قدام القرش، اللي هو كمان مستوى تنفيذه كان ضعيف على صعيد المؤثرات الخاصة والجرافيكس.
47 Meters Down: Uncaged فيلم مايشوفهوش غير المهووسين بعالم البحار وأسماك القرش واللي عندهم استعداد يكبروا دماغهم عن أي تفاصيل ضعيفة مقابل مغامرة جديدة في المحيط.
